EU puisit amiinik eqqusseqqusiunnaarniarpoq

Puisit amiinik nioqqutissianik eqqusseqqusiunnaarnissaq pillugu siunnersuut EU Parlamentimi julip qaammataani eqqartorneqassaaq. Siunnersuut akuerineqassappat tamanna Kalaallit Nunaata aningaasaqarneranut ajalusoortitsisinnaasoq nunanut allanut naalakkersuisoq, Aleqa Hammond, oqarpoq.
juunip 28-at 2008 17:13

Nunanut allanut naalakkersuisoq, Aleqa Hammond Danmarkimi nunanut allanut ministeri, Per Stig Møller ippassaani ataatsimeeqatiginerani puisit amiisa EU-mi ilaasortanut eqquteqqusaajunnaarsinniarnerat ilanngullugu eqqartorpaat.

- EU-mut puisit amiinik eqqusseqqusiunnaarnissaq atuutsilerneqalissagaluarpat tamanna piniartortatsinnut aalisartortatsinnullu - soorunalumi aamma ilaqutariit aningaasaqarniarnerannut annertoorujussuarmik sunniuteqartussaavoq, Aleqa Hammond oqarpoq.

- Taamaattumik oqaloqataanissarput sakkortunerusariaqarpoq, EU parlamentimi ilaasortat isummernissaannut tapertaasariaqarpugut annertuumik, aamma kommisærit oqaloqatigiissuteqannginneranni tamakku ilanngullugit saqqummiunneqartariaqarput, Aleqa Hammond oqarpoq.

Naggueqatigiit Inuit puisit amiinik nioqqutissiaat inerteqqussummut ilaatinneqassanngitsut Aleqa Hammondip Per Stig Møller peqatigalugu siunnersuutigissamaarpaat.

- Piujuaannartitsinissaq, neqissaqarniarnerlu aallaavigalugit puisit piniagaapput, Nunanut allanut Naalakkersuisoq, Aleqa Hammond oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq