EU: Puisit amii naamik
Puisit amiinik Canadameersunik Ruslandimeersunillu eqqussuinerup inerteqqutigineqalernissaa EU-parlamentimi ilaasortanit amerlanernit maanna isumaqatigineqalerpoq. Puiseeqqat avaartaannarlugit toqunneqartarnerannut EU-kommissionip akerliunera taamaalilluni illuatungilerneqarpoq. Inerteqquteqalernissaq Kalaallit Nunaanni puisinniartarnermut tunngassuteqanngilaq, sunniuteqartorujussuusinnaassaarli.
1980-ikkunni assingusumik pisoqarmat, nunatsinni ileqquusumik puisinniartarnermut taamani tunngassuteqanngikkaluartoq, piniartunut kingunipiloqaqaaq. Ameerneq taamani eqqugaanerloqaaq, piniartullu isertitaarutingajavipput.
Atsiortitsinernut Kalaallit Nunaata Bruxellesimi sinniisaat Naalakkersuisullu akerliugaluarput, kinguneqanngitsumilli.
EU-parlamentimi ilaasortaq, tuluk, avatangiisinut illersuisoq, Caroline Lucas, atsiortitsinernik aallarniisuusoq, ullumi nalunaarpoq, puisit amiinik eqqussuinerup inerteqqutaalernissaanut atsiornerit
373-t nalunaarutigineqareersut - ilaasortanik arfinilinnik taamaalilluni amerlanerussuteqalersitsisoqarpoq.
- Naakkittaatsuliorneq unitsinneqarniassammat amerlanerussuteqartut atsiormata pilluaammeqqaqaanga, Caroline Lucas tusagassiutinut nalunaaruteqarnermini ilaatigut allappoq.
