EU pillugu isumaqatigiinniarneq sumut killinnersoq paaserusuppaat

apriilip 18-at 2005 17:23

Kalaallit Nunaata EU-llu akornanni isumaqatigiissutip nutarternissaanut atatillugu isumaqatigiinniarnerit sumut killinnersut, EU-milu ilaasortaanerup qanoq nunatsinnut iluaqutaanerutiginissaanera inatsisartuni Atassutip apeqquserpaa.

Nunatta EU-llu akornani aalisarsinnaanermut isumaqatigiissutaat ukioq 2006-mi atorunnaassaaq, nutarterneqarnissaanullu atatillugu isumaqatigiissuteqarnissaq, qaammatini makkunani inissinniarneqassalluni. Aningaasaqarnikkut ingerlatsinissaq pillugu nalunaarut, ualimut inatsisartuni eqqartorneqarmat, Atassut sinnerlugu inatsisartuni ilaasortaq Augusta Salling, isumaqarpoq EU-mut isumaqatigiissutissaq pillugu ersarinnerusumik ilisimatinneqartariaqarlutik.

- Tassami assorujussuaq pingaaruteqarmat paasisaqarfigissallugu isumaqatigiinniarnerit sumut killinnersut aammalu aalisakkat EU-mut tuniniarnagit nunatsinni aalisartut nammineerlutik aalisassappatigit, aningaasatigut suliffissaqarnikkullu nunatsinnut qanoq akilersinnaatigisumik, aammalu isumaginninnikkut aningaasatigut qanoq sipaarutaasinnaatiginersoq misissorneqarsimanersoq paaserusussimavarput, Augusta Salling oqarpoq.

Aningaasaqarnermut naalakkersuisoq Josef Motzfeldt oqarpoq EU-mi isumaqatigiissut 320 mio.kr-nit tungaanut aningaasartalik, nutaamik isumaqatigiinniutigineqarnissaanut Atassut nalornissuteqarmat paasisinnaallugu.

- Tass siullermik Ataassutikkut ilumoornerassuakka, siunissaq nalorninartorpassuarnik ulikkaarmat. Aalisagartassat nammineq pisariartuaarnissaat Naalakkersuisunit siunnerfigineqartoq Aningaasaqarnermut naalakkersuisup Josef Motzfeldt-ip aamma oqaatigaa.