EU Parlamenti Strassbourgimi imaluunniit Brüxellesimi

EU parlamentip Strassbourgimiinnissaa imaluunniit Bruxellesimiinnissaa isumaqatigiinngissutaagaluttuinnarpoq.

Illoqarfiit taakku akornanni uteqattaartarneq danskit naalakkersuinermik suliaqartut asuli akissaajaataaginnarsoraat.

EU-mi nunat ilaasortaatitaqartut ilaasortaatitamik Strassbourgimi imaluunniit Bruxellesimi ataatsimiinnerinut ukiumut 1,5 milliard koruuninik akiliisarput.

- Aatsaallu taama sianiitsigisunik, Dansk Folkepartiimi ilaasortaq Jesper Langballe oqarpoq.

Taamatut oqarneq EU parlamentimi ilaasortaasimasumit massakkullu Radikalet EU pillugu oqaaseqartartuanit Lone Dybkjærimit taperserneqarpoq:

- Sapaatip-akunnera ilivitsoq Strassbourgimi ataatsimiittussalluni allaffeqannginneq sianiilliorneruvoq, Lone Dybkjær oqarpoq.

EU-mi naalakkersuinermik suliaqartut kisimik naammagittaalliunngillat, Europami innuttaasut 1 millionit missaanniitut ilaasortat nooqattaarneri naammagittaalliutigaat.

EU parlamentip Strassbourgimiinnissaa franskit akerleraat. Tamanna tunngavigalugu danskit ministeriunerata aaqqiissuussisimanerup imaaliallaannaq allanngortinneqarnissaa ilimaginngilaa:

- EU parlamentimi ilaasortat ataasiinnarmik ataatsimiittarfeqalissagaluarpata EU-mi isumaqatigiissut allanngorteqaqqaartariaqassaaq. Massakkorpiarlu EU-mi ilaasortat allannguinissaq isumaqatigiissutiginngilaat, danskit ministeriunerat Anders Fogh Rasmussen oqarpoq.

Taassumalu naammagittaalliortut isumaqatigigaluarlugit allannguiniarluni suliniuteqarusunngikkallarpoq.