EU-Parlamenti: Mobiilinut orsersuummik ataasiinnarmik peqalerli
Batteriinut orsersuut ataaseq naammappoq - mobiilip meqqia suugaluarpalluunniit. Batteriinut orsersuut ataaseq naammappoq - tassa orsersuut mobiilinut tamanut atorneqarsinnaasoq. EU-Parlamentimi ilaasortat politikikkut assigiinngitsunik tunuliaqutallit amerlanerussuteqartut taama isumaqarput.
Allannguiniarnermilu EU-Kommissioni pakatsisitsimasoq, Danmark sinnerlugu EU-parlamentimi ilaasortaq, Christel Schaldemose (S) ilaasortaqartini allat isumaqatigalugit taama oqarpoq.
- EU-Kommissionip mobiilinut orsersuummik ataasiinnarmik atorneqarsinnaasumik naleqqussaasimannginnera ajorluinnarpoq, tamannami ukiorpassuarni eqqartorparput. Aaqqiivigineqarniarli, Schaldemose oqarpoq.
EU-mi ilaasortat IT-mut atortut eqqagarpassuit atorsinnaajunnaarsimasullu amerliartuinnartut ukkataraat.
Polen sinnerlugu ilaasortaq, Róza Thun und Hohenstein piumasaqarpoq, EU-Kommissioni ukiup affaata iluani siunnersuuteqassasoq.
- Innuttavut mobiilinik pisisimasut allatut ajornartumik mobiilinut orsersuutinik pisisariaqartarput, tamanna isumalluutinik atuinerlunneruvoq, taamatullu ingerlasoqaannarsinnaanngilaq, Hohenstein oqarpoq.