Puisit amii pillugit naalakkersuisut suli paasisitsiniaarusupput.
Tamannalu pillugu Piniarnermi aalisarnermilu pisortaqarfik EU kommissionimut allagaqarniarpoq.
Piniarnermi naalakkersuisoq Finn Karlsen ima oqarpoq.
- Taanna pillugu EU kommission-imut allagaqarpugut, taakku eqqunngitsumik paasitinneqarsimapput, oqaramik puisit amii nunatsinniit avammut tunineqartartut 3 %-iinnaammata piniartunut kinguneqarnavianngitsoq.
Finn Karlsenip oqarnera naapertorlugu ammit nunatsinnit avammut tunineqartartut 20-30 procentip tungaanut amerlassuseqartarput.
Nunatsinni puisinik anaartaalluni toqutsisoqarneq ajornera naalakkersuisunit avammut paasititsiniutigineqartuartaraluartoq qalleqqillugu EU taama aalajangiussivoq. Naalakkersuisugummi taava qanoq iliussappat?
- Assigiinngitsut tamaasa atortariaqarpagut, soorlu nunani allaninngaanneersut neqit EU-minngaanniit pisartakkavut akitsuuserneqarsinnaapput. Nunarsuarmili niiveqatigiiffissuarmi ilaasortaanerput tunngavigalugu taamaaliorsinnaatitaanngilagut, oqarpoq.
Taamatuttaaq ornillugit oqaloqatigiartorneqarsinnaanerat periarfissaanerarpaa.