EU-p puisit amii pillugit paasititsiniaanera Folketingimi isornartorsiorneqartoq
Partiip Venstrep Kalaallit Nunaat pillugu oqaaseqartittagaata Marcus Knuthip oqaatigaa EU annerusumik paasititsiniaasariaqartoq, EU-kommissionip nittartakkatigut nutaanik paasissutissiiginnartariaqarani.
- EU Europa tamaat sinnerlugu sulivoq. Kalaallit Nunaatalu puisit amiinik tunisassiortarnera Danmarkimi innuttaasunut pingaaruteqarpoq. Puisinniartarnerlu pillugu Europami assigiinngitsutigut paatsuungassutigineqartartut EU-kommissionip aaqqiiviginiartariaqarpai, Marcus Knuth oqarpoq.
Naggueqatigiit Inuit puisit amiinik tunisassiortarnerannut tunngatillugu paasititsiniaanermi suliniutinik nutaanik EU-kommissionimi pilersaaruteqartoqarnersoq, Danmark sinnerlugu EU-parlamentimi ilaasortat pingasut paaserusuppaat, aningaasartuutit qanoq amerlatiginersut ilaatigut paasiniarneqarluni. Danmarkimi naalakkersuisut akissutigineqartussat utaqqimaarniarpaat.
Aamma atuaruk Great Greenlandip pisortaata EU-p meqqilersuinissaa kissaatigaa
Aamma atuaruk Ditte Sorknæs: Skandinaviamiut puisit amiinik utaqqiinnarput
EU-kommissionili qisuariaateqanngippat Danmarkimi naalakkersuisut kimigiiserniartut, Marcus Knuthip erseqqissaatigaa:
- Iliuuseqarnissatsinnut soorunami piareersimavugut, EU-parlamentimi ilaasortaatitsinnit naalakkersuisullumi tungaaninngaanniit iliuuseqartoqarnissaa sukataarutigissavarput, Marcus Knuth, Venstrep Kalaallit Nunaannut tunngasunut oqaaseqartittagaa oqarpoq.
Socialdemokraatit Kalaallit Nunaannut tunngasunut oqaaseqartittagaat Karin Gaardsted, EU-kommissionip naggueqatigiit Inuit puisinniartarnerannut tunngasunik paasititsiniaasarnera isornartorsiorpaa.
- Puisit amiinik EU-mut eqqusseqqusinnginneq EU-p nammineq qaqinnikuuaa, Kalaallit Nunaannullu tamanna innarliinikuuvoq. Aaqqiisoqarnissaalu pillugu EU-kommissionip iliuuseqarnerusinnaanera taamaammat naatsorsuutigineqartariaqarpoq, Socialdemokraatit Kalaallit Nunaannut tunngasunut oqaaseqartittagaata Karin Gaardstedip oqaatigaa.
Aamma atuaruk Kalaallit puisit amiinik EU-mut tunisisinnaanerat atuutiinnassaaq
Enhedslistenittaaq paasisitsiniaaneq naammaginngilaa
Europami innuttaasunut puisit amii pillugit EU-kommissioni paasititsiniaasussaanermik pisussaaffeqarpoq.
Paasititsiniaanerilli Folketingip partiivinit naammagineqanngillat. Partii Enhedslisten naammaginninngilaq.
Enhedslistenip Kalaallit Nunaat pillugu oqaaseqartartuata, Christian Juhlip EU suliamut iluamik naammassinnissinnaasorinngilaa.
- EU pimoorussisumik paasititsiniaasinnaanera upperinngilluinnarpara. Piumasuugaluarunik Europami illoqarfinni anginerni allagartarujussuarnik atuillutik paasititsiniaasinnaagaluarput, ilaannikkummi taamaaliortarput. Kisianni taamaalioraangamik EU-mut kisimi tunngasarpoq. Puisit amii pillugit paasititsiniaaneq taama annertutigissariaqaraluarpoq, taamaattoqarnavianngilarli, Christian Juhl KNR-imut oqarpoq.
Iluamik paasititsiniaasoqassappat nunat avannarliit naalakkersuisuisa namminneerlutik suliarissagaat, Christian Juhl isumaqarpoq.
- Nunat Avannarliit ministeriisa siunnersuisoqatigiiffiata ilanngunnerisigut qaninaariniarluta aqqutigisinnaavarput. Taakku nunarsuaq tamakkerlugu, aasia ilanngullugu atassuteqarfeqarput, nunallu atassuteqarfii nunat avannarliit nioqqutissiaannik pilerinnittarput. Kalaallit Nunaallu siunnersuisoqatigiiffimmut ilaasortaammat, nammineerluni suliarinnissinnaavoq, Christian Juhl oqarpoq.