Ataatsimeersuarnerit tulleriiaat: EU-p pisortaa aamma naalakkersuisut siulittaasui Nuummukalersut

Nuuk politikkikkut ataatsimiinnerni arlalinni sapaatip akunnerata tulliani qitiuffiussaaq.

Illoqarfiit pingaarnersaat EU-Kommissionip siulittaasuanit, Ursula von der Leyenimit, danskit ministeriunerannit, Mette Frederiksenimit (Socialdemokraterne) aamma Savalimmiormiut lagmandiannit Beinir Johannesenimit (Fólkaflokkurin) septembarip arfernannit arfineq-pingajuannut ilaatigut tikeraarneqassaaq.

Naalakkersuisut tusagassiuutinut nalunaarummi paasissutissiipput.

Tikeraarnerat Ursula von der Leyenip Mette Frederiksenillu Nuummut tikinneranni septembarip arfernanni aallartissaaq.

Tikeraarneranni EU-p nunattalu suleqatigiinnerisa nukittorsarneqarneranut ataatsimoorullugu nalunaarut ilaatigut atsiorneqassaaq.

Naalakkersuisut siulittaasuata, Jens-Frederik Nielsenip tikeraartoqarnissaq qilanaaralugu oqaatigaa:

- Nunarsuarmi politikikkut pissutsinut tunngatillugu EU-p erseqqissumik tapersersorluta nalunaarutigaa peqatigisaanillu suleqatigiinnitta annertusarnissaanik kissaaterput akorluarpaat. Ullut aggersut assut qilanaaraakka aamma Kalaallit Nunaannut ataatsimoorullugu suleqatigiinnermik isumaqatigiissut pillugu itinerusumik oqaluttuarnissara qilanaaralugu, Jens-Frederik Nielsen tusagassiuutinut nalunaarummi oqarpoq.

EU-mit tapiissuteqarneruneq

EU-p nunatsinnut tapiissutiminik 2028-mit ukiuni arfineq-marlunni marloriaatinngorniarlugit siusinnerusukkut siunnersuutigaa.

Tusagassiorfik Euractiv naapertorlugu EU-p aningaasaliissutissatut 150 millionit euronik aningaasartaqartut sapaatip akunnerata tulliani atsiorneqarnissaat pilersaarutigaa.

Ursula von der Leyenip nunat tamalaat akornanni suleqatigiinnermut Europa kommissæri Jozef Síkela angalaqatigissagaa, tusagassiorfiup allappaa.

Naalagaaffeqatigiit aqaguani ataatsimiissasut

Jens-Frederik Nielsenip Mette Frederiksen aamma Savalimmiuni lagmandi Beinir Johannesen aqaguani tassa septembarip arfineq-aappaanni naalagaaffeqatigiit ukiup affakkaartumik ataatsimiissapput.

Taakku nunatta, Savalimmiut Danmarkillu akornanni politikikkut aningaasaqarnikkullu ataatsimut soqutigisat ilaatigut oqaluuserissavaat.

- Ukiuni makkunani pisussaaffilerneqarpugut qanimut suleqatigiissalluta. Soorlu inuit pingasut umiatsiami ataatsimoorlutik ipoqatigiittariaqartut ataatsimoorussamik anguniagaqarnissarput qulakkeerniarlugu, taamatut aaqqissugaanerput inissisimavoq, Jens-Frederik Nielsen oqarpoq.

Illersornissamut sillimaniarnermullu politikki

Politikkikkut ataatsimiinnerit septembarip arfineq-pingajuanni ingerlaqqissapput, tassanilu NUnanut allanut, Sillimaniarnermut Illersornissamullu Politikkikkut Suleqatigiissitami ataatsimiittoqassalluni.

Tassani Nunanut Allanut, Inuussutissarsiutinut Aatsitassanullu Naalakkersuisoq, Múte B. Egede aamma Aningaasaqarnermut Naalakkersuisoq Aqqaluaq B. Egede ilaatigut peqataassapput.

Danskit Savalimmiormiullu naalakkersuisuisa siulittaasui ministerillu arlallit ataatsimiinnermi peqataanissaat aamma naatsorsuutigineqarpoq.

Nunatsinni, Danmarkimi Savalimmiuni, EU-milu politikikkut qitiusumik suliaqartut arlallit taamaalilluni Nuummi ulluni taakkunani pingasuni katersuutissapput.