EU-mi nutaanik ataatsimoorussanik peqqarniisaarniarnermut akiuussutissanik inatsisiliornikkut peqqarniisaarniat naninissaannut ersitinnissaannullu pitsaanerulersitsissapput, Londonimi peqqarniisaariaraluartoqarnerata kingorna EU-mi ilaasortat inatsisartuneersut arlallit isumaqarput.
EU-mi ataatsimiititaliarsuami siulittaasup tullersortaa, Franco Fratini assigiinngitsunik siunnersuuteqarpoq qanoq EU peqqarniisaarniat naninissaannut ersitinnissaannullu pitsaanerulissanersoq. Qaartartuliornissamut ilitsersuutinik internetikkut nittartaassineq inerteqqutaalissaaq. Qaartartunik tammartoqarsimagaangat EU-mi nunat imminnut mianersoqqusassapput. Timmisartumillu EU-liarlutik ilaasut nalunaarsorneqartassapput.
Franco Fratinip uparuarpaa USA-mi 2001-imi peqqarniisaartoqarnerata kingorna piumasaqaataalersimasoq timmisartunik ilaallutik USA-liartartut nalunaarsorneqartalersimasut, ilaatigut atit angalanerillu, peqqarniisaartoqaqqinnginnissaa anguniarlugu, nalunaarsorneqartarlutik.
Aammattaaq Danmarkip Radioanit nalunaarutigineqarpoq Londonimi Glasgowimilu qaartartumeereriaraluartoqarnerata kingorna inuit arfineq-pingasut tigusarineqartut imminnut atassuteqarsimasut.
Tigusarineqartut arfineq-marluk Tuluit napparsimaviini nakorsaapput ilaalu nakorsatut ilinniartuullutik. Tigusarineqartorlu ataaseq nakorsamut nuliaalluni, laborantitullu sulisuulluni, tuluit nutaarsiassaqartitsiviat BBC taama paasissutissiivoq.
Peqqarniisaarniartutut pasisat allat marluk Blackburn-imi tigusarineqarput, tigusarineqarsimasunut allanut attuumassuteqarnersut politiinit oqaatigineqanngilaq. Politiit oqaaseqarusuppallaanngitsut europami nutaarsiassaqartitsiviit nalunaarput.