EU-p nunarput iluanaarutigingaatsiartarpaa

aggustip 18-at 2005 14:03

EU-p nalunaarusiaa nutaap takutippaa EU-p nunarput aalisarneq pillugu niueqatiginerani iluanarutigingaatsiartaraa, tamannalu Aalisarneq Pillugu Siunnersuisoqatigiinnit aalassassutigineqarpoq.

POSEIDON-rapport-i julimi ukiormanna saqqummersup takutippaa, nunarput EU-mut aalisarnermut isumaqatigiissuteqarnini pissutigalugu iluanaaruteqangaatsiartartoq. Tassa nunarput 1 euro-mik piguni EU 1,54 euromik pisarmat. Tassa EU 50 procenti sinnilaarlugu nunatsinnit pisassiissutigineqartunut iluanaaruteqartarpoq.

Tamanna paasillugu Aalisarneq Pillugu Siunnersuisoqatigiit nunatta EU-mut isumaqatigiissuteqarnera allanngortinnialerpaat, EU-mut isumaqatiginninniarnerit massakkut ingerlasut aqqutigalugit anguniarneqarluni.

Aalisarneq Pillugu Siunnersuisoqatigiinni siulittaasoq Peter S. Olsen oqarpoq, kattuffiit tamanna anguniarsaralugu iliuuseqalereersut, assagissallu utertinneqarnissaat soqutigineqartunut ilaasut.

-Pingaartumik ukua avataasiortut massakkut EU-mi pisassat avataasiortunut aalisarneqartarput, imaluunniit kilisaatinut angisuunut.

Taassuma saniatigut sinerissami qanittumi aalisartut annermik soqutigaat assagiarsuit EU-mut tunineqartartut. Taakku aamma KNAPK-p kissaatiginikuuai nammineq aalisarsinnaallugit, tassami taakku killilersugaajartuinnarmata, taakku KNAPK-mi ilaasortat nammineq aalisarsinnaammatigit. EU-mu tunineqartartut taakkuupput 1000 tons-it, Peter S. Olsen oqarpoq.

Aalisarneq Pillugu Siunnersuisoqatigiit Namminersornerullutik Oqartussanut pisoq pillugu ataatsimeeqatiserinnipput.

EU-mut isumaqatigiissut tunngavigalugu nunarput ullumikkut EU-mit 320 millioni koruninik pissarsisarpoq. Isumaqatigiissut aappaagu ukiup naanerani atorunnaassaaq, isumaqatigiissummullu nutaamut januaarip aallaqqaataani 2007-mi atuutilersussamut isumaqatiginninniarnerit aallartereerput.