EU-p nioqquteqaqqusiunnaarniarnini utaqqittariaqarpaa

Aarrit tuugaavinit sanalukkanik EU-p nioqquteqaqqusiunnaarallarniarnini utaqqittariaqaraa Danmark isumaqarpoq, EU-mili nunat allat isumaqataanersut apeqqutaalerpoq. EU-p ilisimatuussutsimut ataatsimiititaliaa aqagu ataatsimiilerpat aarrit tuugaavinit sanalukkat ilumut nioqqutigeqqusaajunnaarallassanersut paasinarsissaaq.

Ilisimatuussutsikkut naliliinerit tunuliaqutaralugit aarrit tugaavinit sanalukkanik Europami nioqquteqaqqusiunnaarnissaanik Tuluit Nunaat septembari aallartilaartoq qinnuteqarpoq. Aarrit uumasut nujuartat nungutaaqqajaasut niuerneq pillugu aalajangersakkanut ilaapput, tassa CITES-ip allattugaataanut ilaallutik.

Namminersornerullutik Oqartussat aarrit pillugit nalunaarusiaat nutaaq Danmarkip EU-mut aqagu paasissutissiissutigissavaa, aaffattassiisarneq killilersuilernerlu ilanngullugit. Aarrit ilumut nungusaataanngitsumik piniarneqartarnerat Danmarkimit isumaqatigineqartoq CITES-imeersoq Niels Nielsen oqarpoq oqarlunilu EU-p Namminersornerullutik Oqartussat periarfissittariaqaraluarai ukiup affaa ukiorluunniit ilivitsoq nalilersuinissamut.