EU-p killeqarfimmut nakkutilliiveqarfissaa Nuummi atulilerpoq

Danmarkimi inuussutissalerinermut ministerip, Dan Jørgensenip, aalisarnermut, piniarnermut nunalerinermullu Naalakkersuisoq, Finn Karlsen, peqatigalugu EU-p killeqarfimmut nakkutilliiveqarfissaa Nuummi atoqqaartissavaa.

Taama atoqqaartitsineq EU-p killeqarfiata nakkutilliisoqarfiata nunatsinni atoqqaartinneqarnera iluatsillugu nunatta EU-mik suleqateqarluni aalisakkanik nunanut allanut niueqateqalernera nalliussineqassaaq.

Canadamiut aalisariutaat 15-it juunip 22-ata kingorna pisaminnik Nuummi usingiartarput. Taama usingiartoqarnerani aalisakkat EU-mut ingerlateqqinneqartussat Danmarkimi inuussutissalerinermut qullersaqarfimmi killeqarfinni nakkutilliisup, killeqarfiup nakkutilliisoqarfiani siunissami nakkutilliisartussat uumasut nakorsaqarfianeersut, inuussutissalerinermik oqartussaqarfimmeersut aamma Aalisarsinnaanermut Nakkutilliisoqarfimmeersut suleqatigalugit aalisakkanik tulaanneqartunik nakkutiginnipput.

EU-Kommissioni apriilimi nalunaaruteqarpoq, aalisakkanit nioqqutissiat aalisariutinit nunanit allaneersunit, soorlu Canadameersunit Ruslandimeersunillu Nunatsinnut tulaassanut tunngatillugu, Nunatsinni akuerisaasumik killeqarfittut nakkutilliivinni, Nuummi Sisimiuniluunniit siunissami nakkutilliisoqartalissasoq.

Tassa atoqqaartitsineq Nuummi Royal Arctic Linep illutaaniittumi, marlunngorpat aggustip aqqaneq aappaanni nalunaaqutaq 13.00 pisortatigoortumik pissaaq.