EU-p Iran atomreaktorimik neqeroorfiginialerpaa

EU-mi nunat anginerit pingasut Irani atomreaktor-imik, tassa maskiinamik atomip nukinganik atortussanngortitsiviusinnaasumik, neqeroorfiginialerpaat. Iranip uran-imik atomimik nukissiorfinnut sakkussanulluunniit atorsinnaanngorsaalluni nioqqutissiorneranik unitsitsiniaallutik taama neqerooruteqartut, EU-mit aallartitat ullumi taama nalunaaruteqarput.

Frankrigi, Tuluit nunaat Tysklandilu EU-milu nunanut allanut politikkikkut ataqatigiissaarisoq, Javier Solana, Irani uranimik atomimik nukissiorfinnut sakkussanulluunniit atorsinnaanngorsaaneranut taarsiullugu europaminngaanneersumik atomreaktorimik neqeroorfiginiarpaat.

Aallartitaq Iranimik isumaqatiginninniarnermut ilisimasaqartoq tuluit nutaarsiassaqartitsivianut Reutersimut isortortumik taama nalunaaruteqarpoq.

Taanna oqarpoq, EU-mi nunani anginerni pingasuni politikkikkut pisortaasut pingasut Solanallu allaffeqarfianeersut peqatigalugit, suleqatitik USA-meersut, Ruslandimeersut Kinameersullu Londonimi tallimanngorpat siunnersuut eqqartorlugu ataatsimeeqatigiissasut.

Iranimili nunanut allanut ministeri oqarpoq, Iranip uranimik atomimik nukissiorfinnut sakkussanulluunniit atorsinnaanngorsaanini unitsinnianngilluinnaraa.

Taamaalilluni EU-mit iliuuseriniarneqaraluartoq qatangiinnartinneqartussanngorpoq.