EU-p akiliutigisartagai annikillisinneqarput

EU-p nunatsinnut aalisarsinnaanermik isumaqatigiissuteqarneranut akiliutigisartagai annikillisinneqarput, allatigulli tapiissutit qaffanneqarlutik.

Nunarput, Danmark, EU-lu suleqatigiinnissamik ullumi atsioqatigiissapput. Atsioqatigiinnerup qulakkiissavaa, Kalaallit Nunaata EU-mit tapiissutisisarnerata ullumikkutulli siunissami annertutigipajaarnissaa – tassa 320 millioni koruuninik ukiumut tapiissutisisarami.

Nunatsinnut tapiissutit nunatta imartaani aalisarsinnaanermik pisinnaatitaanermik tapiissutitut ulloq manna tikillugu taaguutigineqaraluarput. Aalisarsinnaanermik pisinnaatitaaffiit EU-mit tiguneqarput, nunarput EU-mit 1985-mi animmalli.

EU-p imartatsinni aalisarsinnaaneranik nunatta EU-llu akornanni isumaqatigiissut 2006-p naanerani atorunnaassaaq, EU-millu piumasarineqarpoq aalisakkat pisarineqarsinnaajunnaartut aalisarnermut isumaqatigiissummi allassimasumi nutaami peerneqassasut. Aningaasalli amerlaqatai nunatsinni Nuummut nassiunneqartassapput, sumulli atorneqarneri allatut taaguuteqalissallutik.

Aalisarneq, ilinniartitaaneq, suliffissaqartitsineq, aatsitassat, nukissiorfiit, takornariaqarneq, kulturi, silaannaallu allanngoriartornera pillugit nunatta EU suleqatigerusuppaa.

EU-mit tapiissutit nunatsinni isertitat seks procenterivaat.