EU-p aalisariutit ikiorserniarpai
Ikiorsiinissamik siunnersuut 4,5 milliardit koruuninik aningaasartaqarpoq. Danmarkimi inuussutissat pillugit ministerip Eva Kjer Hansenip siunnersuut misiligutaanerarpaa, tassami siunnersuutigineqartumi tapiiffigineqartussat aalisariutit pisassiissutigineqartunik peqquserlunnerpaanut orsussanillu atuinerpaanut tunniunneqarniarmata.
Danmarkimi aalisartut peqatigiiffianni siulittaasup Flemming Kristensenip siunnersuutigineqartumi danskit aalisartuisa ilanngunneqarnissaat ilimaginngilaa.
2002-mi EU-mi aalisarneq pillugu iluarsaaqqinneqarmat, tamanna annertunerusumik Danmarkimit malinneqarpoq. Tamatuma kinguneranik Danmarkimi aalisariutit 1200-niit 800-nut ikilisinneqarput, aalisakkallu pisarineqartartut ikileriarmata, Danmarkimi aalisariutit amerlassusaat malinnaatinneqarput.
EU-mut ilaasortat allat, soorlu Frankrig, Italia ingammillu Spania taamatut oqaatigineqarsinnaanngillat, nunani taakkunani aalisartut qaammatini kingullerni uuliap akitsoraluttuinnarnerata kamaatigalugu naammagittaalliuutigaat. Siunnersuut tapersersorneqarpallaanngilaq, oqaatigineqarluni nungusaataanngitsumik aalisarnermut iluaqutaanavianngitsoq.
