EU Nunatsinnut 1,6 mia. koruuninik tunissuteqarniarpoq
Namminersorlutik Oqartussat taamaaliornissaminnut EU-Parlamentimit sapaatit-akunnerata siuliani akuerineqarput.
Lida Lennertip, Nunatta EU-mi Sinniisoqarfiani pisortap, Berlingske Businessimut oqaatigaa, aningaasat amerlanersaat ilinniartitaanermut atorneqassasut, pingaartumik meeqqat atuarfiannut inuussutissarsiutitigullu ilinniartitaanernut, inuusuttut piginnaanngorsaslutik ilinniartut amerlineqarnissaat anguniarlugu.
- Inuusuttortatta inuussutissarsiornerup iluani siunissami periarfissanut piareersarnissaannut atorneqassapput. Kalaallit Nunaat maanna pingaarutilimmik ineriartorfiuvoq, inuusuttortattali affaa piginnaanngorsarlutik ilinniagaqartariaqarput. Tamatumalu suliniuteqarfiginissaanut EU-mit tapiissutit atorneqassapput, aviisimut oqarpoq.
Isumaqatigiissut 2014-imit 2020-mut atuutissaaq, aningaasallu naatsorsuutigisamit amerlaneruleratarsinnaapput.
EU-p ukiunut arfineq-marlunnut missingersuutai, siorna akuersissutigineqartut, siullerpaamik ikilisaaffigineqarput. Taamani Kalaallit Nunaata aningaasanik pissarsiassai missingersuutit pillugit isumaqatigiissut naapertorlugu 183,89 mio. europput. EU-Kommissionilli aningaasat taakku kingornatigut amerlivai - 217,8 mio. euronngorlugit, taakkulu Europaparlamentimi amerlanerussuteqarluartunit ippassigami akuersissutigineqarput.
EU-milu Ministerit siunnersuisoqatigiit qaammammi uani kingusinnerusukkut ataatsimiinnerini aalajangiineq akuersissutigineqarpat EU-mit tapiissutit piviusunngortinneqassapput, aviisi Berlingske Businessullumi taama allappoq.