EU nunatsinni ilisimatusarnermut aningaasaleeqataasinnaavoq

Nunanut allanut naalakkersuisoq Josef Motzfeldt EU-p kommissioniani siulittaasoq José Manuel Durão Barosso nunatta EU-llu isumaqatigiissutissaa pillugu ullut 14-nit qaangiuppata ataatsimeeqatigissavaa.

Nunanut allanut ministeri Per Stig Mølleri Barossop allaffiani ataatsimeeqataassaaq.

Josef Motzfeldtillu kissaatigaa isumaqatigiissut aalisagaannarnut tunngassanngitsoq:

- Aalisagaannaat pigunnaarlugit, kisianni EU aningaasaliissuteqaqataasinnaavoq nunatsinnut ilisimatusarnermut, ilinniartitaanermut, immaqalu nunatta iluani angallannermut tunngasunut, tassalu taannaavoq Barossomik naapitsinitsinni aallartitassarput, Josef Motzfeldt oqarpoq.

Josef Motzfeldtip EU-p kommisioniani qullersaq Barosso ataatsimeeqatigisussanngoramiuk nuannaarutigeqaa, siornami USA-p nunanut allanut ministeria Colin Powell Igalikumut tikeraarsarpaa, isumaqatigiissuteqarfigalugulu.

EU-mik isumaqatigiissutissaq nutaassaq nunatsinnut periarfissaqartitsineruniassaaq.

Qulakkeerniarneqarpormi 320 milliuuni koruunit nunatta EU-mit aalisarneq pillugu isumaqatigiissummit pissarsiarisartagai annaaneqassanngitsut.