EU Nunarpullu atsioqatigiipput
Nunat tamalaat unammilleqatigiillutik assersuutigalugu aatsitassanik nioqquteqartarnerannik Nunatta ataqqinninnissaa isumaqatigiissutip qulakkiissavaa, Kinamiummi aatsitassanik qaqutigoortunik tunisassiornerminni kisermaassipajaarlutik ullumi inissisimanertik iluaqutigalugu Nunatsinnik sunniiniarsinnaanerat taama isumaqatigiissusiornikkut killilersimaarneqarsinnaasoq, Naalakkersuisut siulittaasuata Kuupik Kleistip oqaatigaa.
- EU-p Kalaallit Nunaatalu katinnissinnaannik aaqqissuisuunissara assut nuannaraara, EU-p suliffissuaqarnermut kommissæria Antonio Tajani oqarpoq.
Aatsitassat qaqutigoortut Nunatsinniittut nunarsuarmiunit tamanit unammilleqatigiinnikkut piiarneqarsinnaanissaat siunniunneqarpoq, EU-lu Nunatsinnut 2014-ip 2020-llu akornanni 1,6 milliardit koruunit missaannik aningaasaliinissaminut piareersimalluni.
Anorisaatit, atortut elektroniskiusut, oqarasuaatillu angallattakkat aatsitassat qaqutigoortut iluaqutigalugit ilaatigut sananeqartarput, Kinallu matumani kisermaassipajaartutut inissisimanera pissutaalluni aatsitassat qaqutigoortut akii qaffarujussuarsinnaapput, assersuutigalugu oqarasuaatit angallattakkat atortullu elektroniskiusut allat akii qaffarujussuartillugit.
Taamaammat aatsitassat nunatsinneersut nunat tamalaat unammilleqatigiinnerisigut piiarneqarnissaat pingaaruteqartoq, Antonio Tajanip oqaatigaa, isumaqatigiissutilllu matuma tamanna qulakkiissammagu, Antonio Tajani nuannaarpoq.
- Ullumikkut nuannaaqaanga, Kalaallit Nunaatami nunat tamat malittarisassaat malillugit ingerlanissaa naatsorsuutigaara, Antonio Tajani oqarpoq.
Isumaqatigiissullu malitseqarumaarpoq. Timitalersorneqarnissaa maanna aallartissaaq, 2014-iutinnagulu tamanna naammassereersimassalluni. Isumaqatigiissummi EU-mut aningaasatigut iluaquteqassava? Tajani aperineqarami taanna oqarpoq aningaasatigut toqqaannanngikkaluamik iluaqutissartaqassasoq.
- Arlaannik tuniniagaqanngilagut, imaluunniit aatsitassanik kiilunik ima amerlatigisunik tuniniagaqanngilagut, kisianni tassa suleqatigiinnissamik isumaqatigiissuteqarpugut. Aamma naalakkersuinikkut siunertaqaqatigiinnermik isumaqatigiissuteqarneruvoq, Naalakkersuisut siulittaasuat Kuupik Kleist oqarpoq, nunallu tamat unammilleqatigiinnikkut niueqateqartarneranni malittarisassat malinneqarnissaat pingaaruteqarnerarlugu.
- Ullumikkut atsiukkatsinni aamma toqqammaviit pingaaruteqartut ilaapput, tassalu kiffaanngissuseqartumik niueqatigiinnermut tunngaviusut taakkua aamma uagut malillugit suleqatigiissasugut. Aamma oqarusuppunga ullumi atsioqatigiinneq nunatta nunat tamalaat akornanni inissisimaneranut annertuumik nukittorsaataasoq, taamaalilluni Kinamut tunngatissagaanni massakkut nunat arlaalluunniit imaluunniit kattuffiit arlaat kisermaassilluni aatsitassarsiorneq eqqarsaatigalugu Nunatsinni suliaqarsinnaanngilaq, Naalakkersuisut siulittaasuat Kuupik Kleist oqarpoq.
