EU-mut ilaasortanngornianut piumasat sakkortunerussapput

Mianersorluni ingerlaniartoqartussanngorpoq EU-mi naalagaaffiit qullersaat Bruxelles-imi ullumi ataatsimiilerpata.

Nunat ilaasortatoqqat innuttaat nunanik nutaanik qanittukkut ilaasortanngortoqannginnissaanik eqqissisarneqartariaqassapput.

Aappaatigullu ilaasortanngorniarlutik qinnuteqartut inussiarnersumik pissuseqarfigineqartariaqarlutik, imminiiginnarneqartutut misigisimannginniassammata.

EU-mi qullersat unnugu ataatsimiinnissaanni ilaatigut eqqartorneqassaaq, nunanik nutaanik ilaasortanngorniartoqartillugu piumasaqaatit sakkortusarneqarnissaat.

EU-mi nutaanik ilaasortanngortitsinissaq tunuarsimaarfigineqarpoq, ilaatigut Tyrkiap angeqalunilu piitsuusup muslimeqarfiusullu ilaasortanngornissaa nangaanartoqartinneqarluni.

Tyrkia immikkut oqaluuserisassanut ilaanngikkaluarpoq, taamaattorli EU-p allilerneqarnissaa oqaluuserineqalerpat aallaaviunngitsoornaviarani.

Nalinginnaasumik isumaqatigiissutigineqarpoq ukiortaamiit nunat EU-mut ilaasortaasut 27-usut aaqqinniagassatik aaqqeqqaartariaqaraat.

Tamatuma saniatigut nunanut ilaasortanngorniartunut piumasaqaatit sakkortusineqassapput ilaasortaareersullu attaveqatigiinnerat nukittorsarneqartariaqarluni.

Unnugu ataatsimiinnissamut atugassami kommissionip nalunaarusiaani ilaatigut taama allassimasoqarpoq.

Nunat demokratimik aatsaat ingerlatsinialeruttortut ilaasortanngornermikkut eqqartuussiveqarnertigut aaqqissuussinertik, naalagaaffiup iluani peqquserlunnerit ajortullu allat iluarsartuussinnaasimagaat, aningaasaqarnerminnillu pitsanngoriartortitsisimasut nalunaarusiami oqaatigineqarpoq.

Taamaattumik nunat ilaasortanngorusuttut, soorlu Tyrkia nunallu balkanimiittut ajuallatsinnaveersaartariaqarput, taamaalillutik ilaasortanngornissartik siunertaralugu demokratimik

ingerlatsiniarnertik unitsinnginniassammassuk, Katrine S. Poulsen Bruxelles-imiit taama nalunaarpoq.