EU-mut attaveqarneq nunatta akisussaaffigaa

EU-p tunngaviusumik isumaqatigiissutissaata nunatsinnut savalimmiunullu sunniutissai Folketingimi ilaasortat ullumi oqaluuseraat. Ilaasortat nalunaaquttap akunnerini pingasuni oqallipput.

Atlantikup Avannaani Suleqatigiit oqallinnissamik kissaateqartuupput, Kalaallit Nunaata Savalimmiormiullu inatsisitigut politikkikkullu inatsimmut tunngaviusumut pituttorneqannginnissaat siunertaralugu naalakkersuisut qulakkeerinneqqullugit kissaateqarsimallutik.

Inatsisimmi tunngaviusup 1953-imeersup atuutsinneqalerneratuulli pisoqaqqinnginnissaa Atlantikup Avannaani Suleqatigiit kissaatigaat, taakku isumaat naapertorlugu Kalaallit Nunaat Savalimmiullu taamani oqaasissaqarpallaartitaasimanngimmata. Taamaattumik Folketingimi oqallinneq naammagisimaarlugu Siumut sinnerlugu Folketingimi ilaasortaq Lars-Emil Johansen naliliivoq:

- EU-mut attaveqarnerput nunatta nammineq oqartussaaffigigaa naalakkersuisut qulakkeerpaat, tamannalu partiit oqaaseqartartuisa paasilluarpaat. Lars-Emil Johansen erseqqissaavoq.

Suulli tamarmik naammagineqanngillat. Atlantikup Avannaani Suleqatigiit kissaatigisaattut oqartussaaffiit suut sunnerneqassanersut pillugit misissuisitsisoqassanngilaq, soorlu EU sorsoqataalissagaluarpat qanoq pisoqarnissaanut tunngasut misissorneqarnissaat kissaatigisimagaluaraat. Taamatuttaaq arfanniarnermi inerteqqutit (embargo) EU-p atorunnaarsissappagit qanoq pisoqassanersoq aamma paaserusussimagaluarpaat, tamakkununngali tunngasut savalimmiuni nunatsinnilu inatsisartut namminneq paasiniartussangorpaat.

- Ajoraluaqaaq, erseqqissumik paasisaqarnissamut piumassuseqartoqanngimmat. Lars-Emil Johansen oqarpoq.