EU-mit tapiiffigineqarneq inatsisinik unioqqutitsinertaqanngilaq

Suliaqaqatigiit aviisiat 3F qanittukkut allappoq, qanoq ililluni Royal Greenlandip Danmarkimiittumi Glyngøremi suliffiit 110-t suliffimmut tunisassiorfimmut nutaamut 2008-mi Polenimut nuussimanerai.

Royal Greenlandip suliffissuaassua Koszalinimiittoq EU-kommissionimiit 53 millioner koruuninik tapiiffigineqarluni pilersinneqarpoq. Taamaaliornerlu inatsisinik unioqqutitsinerusoq lektori EU-lu pillugu immikkut ilisimasalik Søren Riishøj isumaqarpoq. EU'p aningaasaliissutai atorlugit suliffeqarfinnik nuussisoqarnera malittarisassanik unioqqutitsineruvoq.

Ussassaarinermut pisortaq Hanne Kvist naapertorlugu 53 millioner koruunit malittarisassanik unioqqutitsilluni atorneqarsimanngillat. Royal Greenlandip polenimi suliffissuarmut tapiissutisiai tunniunneqarput, EU'p malittarisassai suli allanngortinneqanngitsut.

EU'p aningaasaliissutai atorlugit suliffeqarfinnik nunanut allanut nuussineq 2007-imi inerteqqutaalerpoq. Royal Greenlandip millionilikkaat tapiissutisiai aningaasaateqarfimmiit nutaanngitsumeersuupput, suliffeqarfinnik nuussinissamut atorneqarsinnaasut.

Hanne Kvistip Radioaviisimut erseqqissarpaa, oquuttanik tunisassiorfik Glyngørimiittoq suliffissuarmut Polenimiittumut ilannguttussaasimasoq. Glyngørimi oquuttat ukiumut 5.270 tonsit  tunisassiarineqartarsimapput; Polenimi assigiinngitsunik tunisassiornermi, sulisut pingasoriaammik amerlillugit ukiumut 14.500 tonsinngortinneqarsimapput.

- Polenimi tunisassiorneq Glyngørimiit allaaneruvoq, nerpinnilli tunisassiorneq assinganik ingerlanneqarpoq. Tunisassiat pingasunngorlugit avikkaanni, aggornerit marluk saarullinniit, kapisilinniit, kulleriniit qaleralinniillu pisuusut, Royal Greenlandimi tuniniaanermut pisortaq allappoq, naggasiillunilu:
- Taamatut annertusaaneq Danmarkimi pisinnaasimassanngikkaluarpoq.

Royal Greenlandip EU'p tapiissutaasa saniatigut, aalisakkerivimmut Koszalinimiittumut 250 millioner koruuninik aningaasaliisimavoq, ullumikkut taanna 530-nik sulisoqarpoq.

Suliffissuarmut Polenimiittumut millionilikkaanik aningaasaliisimaneq kalaallit suliffinnik annaasaqaatigisimanngikkaat SIK-p siulittaasua oqarpoq.