EU-mit ilinniartitaanermut tapiissutit isumaqatigiissutigineqarput

Namminersornerullutik Oqartussat aamma EU-kommissionip ukiumut 2009-mut Kalaallit Nunaanni ilinniartitaanermut EU-p tapiissuteqarnissaanik isumaqatigiissut ippassaq atsiorpaat.
Allattoq Elisa Isaksen
juunip 10-at 2009 09:12

Isumaqatigiissut atsiorneqartoq naapertorlugu EU-kommissionip 2009-mi 200 millionit koruunit akiliutigissavai.

Isumaqatigiissummi Namminersornerullutik Oqartussat aningaasanut inatsisaanni ilinniartitaanermik suliassaqarfimmut aningaasaliissuteqartoqarnissaa qulakkeerniarneqarpoq, tassunga ilanngullugu immikkut ittumik ilinniartitaanikkut suliniuteqarneq.

Isumaqatigiissut suleqatigiinnissamik isumaqatigiissummut, Kalaallit Nunaata EU-mik 2007-imi isumaqatigiissutaanut 2013-ilu tikillugu atuuttussamut, ilaavoq.

Ukiumi aggersumi EU-kommissionip Namminersornerullutik Oqartussanik suleqateqarluni suleqatigiinnissamik isumaqatigiissummik naliliinissaq isumagissavaa, taamaalillunilu suleqatigiit suleqatigiinnertik naliliivigisinnaaniassammassuk aammalu suleqatigiinnermut ineriartorfiusinnaasunik nassaassaqarnersoq takuniassammassuk.

EU-p tamatumunnga peqatigitillugu nunani issittuni politikkissap aaqqissuunnera suliaraa, taakkualu immikkoortortaat suleqatigiinnissamik isumaqatigiissutip maanaannaq naliliivigineqarnissaani ilanngunneqarnissaat ilimagineqarluni.