EU-mik suleqateqarnerput nalilersoqqissaartariaqarsoraa
Puisit amiinik EU-mut eqqussueqqusiunnaarnissaq piviusunngussappat tuniniaavissanik allanik periarfissarsiortariaqarsinnaavugut. Aalisarnermut piniarnermullu naalakkersuisoq Finn Karlsen taama oqarpoq.
Allattoq Mads Lynge
juulip 17-at 2008 07:41
- Nunat allat EU-mut ilaasortaanngitsut tuniniaavigineqarsinnaanissaat eqqarsaatersuutigisinnaavarput, immaqa aamma pitsaanerulissagaluarpoq. Rusland, Kina aamma Norge matumani periarfissaasinnaapput, Finn Karlsen oqarpoq, nangipporlu:
- EU-p taamatut pissusilersornera nuanniippoq. Qipoqqartassinneqarnissarput iluatsilermat EU aserorterisutut isikkoqalerpoq, puisillu amiinik eqqussueqqusiunnaarnissaq piviusunngussappat suna tullinnguutissanerpoq. EU nunatsinnik soqutiginnikkiartuinnalerpoq, kisianni politikerit Kalaallit Nunaanniittut EU-mik suleqateqarnerput nalilersoqqittariaqalerpaat, Finn Karlsen oqarpoq.
Puisit amiinik EU-mut eqqusseqqusiunnaarnissaq EU kommissærinit juulip ulluisa 23-anni aalajangiivigineqartussaavoq.
