EU-mik isumaqatigiissut kattuffiit nersualaarpaat
- Imatullu paasivara: Assersuutigalugu isumaqatigiissutinut allanut tunngasut aamma pinngitsooratik aamma ataqqineqartariaqartut. Tassuuna soorunami toqqissisimanarpoq EU Kalaallit Nunaatalu pituttorsimanngikkaluamik taamatut isumaqatigiissusiornerat, SIK-p siulittaasua Jess G. Berthelsen taama oqarpoq.
Aatsitassat qaqutigoortut pillugit Kinap EU-llu akornanni unammilleqatigiittoqalernera taassuma pitsaasoraa, Kinami aatsitassat tamakku kisermaassiffigipajaarlugit inissisimammat.
- Maannakkut ilisimasavut naapertorlugit aatsitassat qaqutigoortut eqqarsaatigalugit Kinap 93 procentit pigai, taamatullu nunani unammilleqatigiinneq qiviassagaanni taava soorunami peqqinnartuunngilaq nunap ataatsip taamatut aatsitassat qaqutigoortut kisimi tigummissappagit. Taamaattumik ataatsimut isigalugu nunatta EU-lu isumaqatigiissuteqarnerat isumaqarpunga Nunatsinnut pitsaasuusoq, Jess G. Berthelsen oqarpoq.
Kalaallit Nunaanni Sulisitsisut Peqatigiiffiata, GA-p, pisortaata Brian Buus Pedersenip Nunatta taamatut isumaqatigiissusiornera aamma nuannaarutigaa.
Sulisartoqarnermut tunngasut pingaarutillit arlallit siunnerfeqatigiilluni isumaqatigiissusiami ilaatinneqarsimanerat, taassuma iluarisimaarpai.
- Sulisoqarnermut tunngasut pingaarutillit ilanngunneqarsimasut siunnerfeqaqatigiilluni isumaqatigiissummi takuneqarsinnaavoq. Suliassat sanaartugassallu annertuut pillugit nalunaarummut Naalakkersuisut tusarniaanerannut atatillugu akissutitsinni tamakku taakkartorpavut. Assersuutigalugu aatsitassarsiornerup ineriartortitsinneqarnerani piukkunnarsaanissaq isumaqatigiissummi pingaartinneqarpoq, tamannalu nuannaarutissaavoq. Isumaqatigiissulli timitalerneqarnissaa suliluunniit aallartinngimmat sukumiinerusumik tamanna oqaaseqarfigisinnaanngilarput, GA-p pisortaa Brian Buus Pedersen oqarpoq.
