EU-mik isumaqatigiinninniarneq

”Kigaatsuararsuuvoq”, Namminersornerullutik Oqartussani atorfilittat nutaamik aalisarnermut isumaqatigiissummik EU-mi aappassaanik isumaqatigiinniareerlutik taama nalunaaruteqarput. Tunngaviusumik isumaqatigiissutip ukiuni 20-ni atuussimasup oqaasertaasa nutarterneqarnissaat isumaqatiginninniarnermi kinguarsaataanerpaavoq.

Namminersornerullutik Oqartussat EU-lu isumaqatiginninniarnermi imminnut ungasissorujussuusut, Namminersornerullutik Oqartussat aallartitaasa pisortaat Danmarkimiittoq Einar Lemche oqarpoq. Taamaakkaluartorli isumaqatiginninniarnernit ajalusoorsimanngitsut erseqqissarlugu.

- Oktobarip qaammataani naapeqqinniarluta isumaqatigiippugut, taamaattumik oqartoqarsinnaanngilaq isumaqatiginninniarnerit ajalusoorsimasut, Einar Lemche oqarpoq.

Aalisarnermik isumaqatigiissut pineqartoq naluneqanngitsutut Nunatta 320 mio. koruuninik ukiumut iluanaarutigisarpaa. Aningaasat taakku Namminersornerullutik Oqartussanit pissarsiarisarneri pimoorullugit isumaqatiginninniutaapput. Aalisagartassat aningaasallu EU-p isumaqatiginninniarfigineqarnerani suli eqqartorneqanngillat. Tamanna aatsaat oktobarip qaammataani Londonimi pingajussaat isumaqatiginninniarnermi eqqartuiffigineqassaaq.