EU-mik isumaqatigiinniarnerit nangeqqilerput

EU-mik isumaqatigiinniarnerit aappassaat Nunatta ullumi aallartissavaa. Namminersornerullutik Oqartussani atorfilittat Bruxellesimi atorfilittat pingasunngorneq ilanngullugu ataatsimeeqatigisassavaat, illua´tungeriillu aalisarnermut isumaqatigiissutip nangeqqinnissaanik suleqatigiillunilu isumaqatigiissutissamik nutaamik pilersaarusiorniarsarissapput.

Isumaqatigiinniarnerit pingasunut avinneqarsimapput, kingullerlu Londonimi oktoberimi ingerlanneqassaaq, Tuluit Nunaata EU-mi siulittaasuuffik tigummimmagu. Tamanna pillugu Kalaallit Nunaata Aallartitaqarfianeersoq Einar Lemche ilisimatitsivoq.

EU-mut isumaqatigiissut nutaaq naapertorlugu EU nunatta karsianut 320 million koruuninik akiliisarpoq, taakkunannga 80 million koruunit ineriartortitsinermut immikkoortinneqarsimallutik.

Aalisarnermut isumaqatigiissut aappaagu ukiup naanerani atorunnaartussaavoq, taamaattumik ukioq 2007-p aallaqqaataani atulersussamik peqalernissaa siunertaavoq. Isumaqatigiinniarnerit pingasuunissaat pilersaarutaagaluartoq tusarfiit tutsuiginartut ilisimatitsipput, imaassinnaasoq sisamassaaneertoqartoq. EU-mi ilaasortat amerliartortillugit nunatta aningaasat isertitarisartakkani tigummiinnassagunigit ilungersungaatsiartariaqassammat.