Aalisagartassat pillugit Kalaallit Nunaata EU-llu isumaqatigiinniarnerat ingerlaleruttorpoq, isumaqatigiinniarnerillu Ilulissani majip naajartornerani naammassineqarnissaat illuatungeriit siunniuppaat. Lars Vesterbirk, nunatta Bruxellesimi sinniisuutitaa, taama ilisimatitsivoq.
Aalisarnermut isumaqatigiissutissamut tunngassutillit teknikkimut tunngasortaat pillugit EU-p kommissionianik Bruxellesimi ataatsimeeqateqarnertik kalaallit aallartitaasa, Aalisarnermut Qullersaqarfimmi immikkoortortami pisortaq, Emanuel Rosing, siuttuliullugu naammasseqqammerpaat.
Apeqqutit EU-p aalisagartassaanut tunngassut naggataarutaasumik oqaluuserineqarnissaat, EU-llu nunatsinnut qanoq akiliuteqartarnissaa isumaqatigiiniarnerit naammassilivinneranni aatsaat aalajangersarneqassapput.
Isumaqatigiissutissaq aalajangersakkanik assigiinngitsunik soorlu pisassiisarnermut tunngasunik pisanillu naatsorsueriaatsinut tunngasunik aamma imaqassaaq.
EU-mik isumaqatigiissuteqarnissat marluupput siulleq aalisarnermut aappaalu suleqatigiinnermut tunngavoq, taanna EU-p nunatsinnut ukiumut 43 million euronik aningaasaliissuteqartarneranik imaqarpoq.