EU-mi tuniniaanermut malittarisassat pissutaallutik kiffartuussinissamik isumaqatigiissut annaaneqarpoq

USA Kalaallit Nunaalluunniit EU-mut ilaasortaanngillat. Taamaakkaluartoq EU'p malittarisassai Pituffik pillugu tusarniaanermi qitiutinneqarput.
Qallunaat nunanut allanut tunngasunut ministeriat aggersarneqarsimavoq amerikamiut mittarfeqarfianni kiffartuussinissamik isumaqatigiissut pillugu nassuiaateqaqqullugu.

EU'p malittarisassai malillugit naalagaaffiup suliffeqarfiutai nunani allamiut piinut naleqqiullugit salliutinneqartussaanngillat.

2013-imi nunanut allanut tunngasunut ministereqarfiup suliffeqarfinnik kiffartuussinissamik isumaqateqarusuttunik akuerseqqaartarnera taamaatinneqarpoq. Siornatigut taamaaliortarsimagaluarput kalaallit qallunaalluunniit suliffeqarfiutaat salliutikkusullugit- soorlu Danamrkip USA-llu isumaqatigiissutaanni 1951-imeersumi piumasaqaataasoq.

Qallunaalli kammeradvokatiata tamanna allanngortissimangaa, nunanut allanut tunngasunut ministeri Martin Lidegaard nassuiaavoq.

- Tassaniuna Danmarkip EU'p malittarisassai unioqqitissinnaangai. Tassami pisoqarfiusoq Kalaallit Nunaanniikkaluarpoq. Kalaallit Nunaannilu nunatta inatsiai malinneqarlutik. Suliffeqarnermut tunngasutigut ilaallu ilanngullugit aamma taamaappoq. USA-una sulisussarsiortoq. Danmarkilu taamaalioqqusaanngilaq - naak nunami allami pisoqarfiugaluartoq - qallunaat suliffeqarfii salliutittussaanngilai.

Grønalndsudvalgimili ilaasortat tamanna akuererusunngilaat.

Inuit Ataqatigiinneersoq Johan Lund Olsen ima oqarpoq:

- EU-mi malittarisassat atuutsinneqarput. Kalaallit Nunaalli EU-mut ilaasortaanngilaq. Aamma pavep pilluaqqusineratigut. Ministerip nassuaiarsinnaavaa, Pituffimmi sullissineq, EU'p avataaniittumi, qanoq ililluni EU'p malittarisassaanut akulerutsinneqarsimanersoq.

Aamma Anette Wilhelmsenip SF-imeersup Pituffik immikkut malittarisassaqarnersoq apersuuserpaa.

- Paaserusuppara, Pituffik issittumi immikkut naalagaaffiunersoq? Pituffimmi inatsisit suut malitsinneqarpat?

EU'p malittarisassai atuunnersut, imaluunniit Illersornissamut isumaqatigiissut Pituffimmi salliutinneqarnersoq Kammeradvokatip akisariaqaraa, oqartoqarpoq.
Martin Lidegaardili isumaqanngilaq, EU'p malittarisassaasa allanngortinneqarnerisa kingunerik Nunatsinnut ajoqutaasussamik allannguisoqarsimasoq.

- Isumaqarpugut EU-mi eqqartuussivik maanna isumaqatigiissuteqarfigisimallugu. Uagut naliliinerput taamaappoq, neriuutigaaralu inatsisilerituugut aamma kukkusimassanngitsut, ministeri akivoq.
--
Tusarniaanermi aamma apeqqutigineqarpoq, sooq Inatisartut, Folketingi, Joint Commitee imaluunniit Permanent Commitee, Kalaallit danskillu ilaasortaaffigisaat malittarisassat allanngortinneri pillugit ilisimatinneqarsimannginnersut.