EU-mi siuttut ataatsimiinnermi isumaqatigiippallaanngillat

EU-mi siuttut Bruxellesimi ataatsimiimmata isumaqatigiittoqarpallaanngilaq. Isumaqatigiissutigisinnaasatuaammi tassaavoq, EU-p silap pissusaa pillugu pilersaarutaani angisuumi suliassanik agguataarinissap isumaqatigiissutiginiarnissaa ajornakusuussaqisoq.
Allattoq Louise M. Kleemann
oktobarip 17-at 2008 12:15

EU-mut ilaasortat 27-usut taamaallaat isumaqatigiissutigisinnaavaat, silap pissusaa pillugu anguniakkat pingaarnerit, 2007-imi marsimi isumaqatigiissutigineqartut suli atuummata, suliassanillu agguataarineq decembarimi EU-mi siuttut ataatsimiinneranni aalajangersaavigineqarumaartoq.

Taamaakkaluartoq ataatsimiinneq ministeriunerup Anders Fogh Rasmussenip “siuariarnerujussuartut” taavaa. Tassami nunat Europap qeqqaniittut kangilliillu arfineq-marluusut, Polen aamma Italia siuttoralugit silap pissusaa pillugu pilersaarut ingerlanniarmassuk, naak aningaasarsiornikkut ajornartorsiortoqaraluartoq.

Tamatumunnga peqatigitillugu Europami Avatangiisit pillugit suliniaqatigiiffiup, nalunaarummi saqqummersitaani Danmark avatangiisit pillugit isumaqatigiissutaareersunut naammassinninnissaminut ajornartorsiornerarlugu oqaatigineqarpoq. Tassa Danmark nunat EU-mut ilaasortaasut marluk peqatigalugit Kyotomi isumaqatigiissummi CO2-mik aniatitsinerup minnerulersinneqarnissaanik isumaqatigiissummik piviusunngortitsisinnaanngitsoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq