EU-mi qullersat niueqatigiinnissamut isumaqatigiissut oqaluttuarisaanermut pingaarutilik atsioraat

EU-mi aqutsisut Tuluit Nunaata Brexitimik taallugu EU-mi ilaasortaajunnaarnissaanut niueqatigiinnissamut isumaqatigiissut ullumi pingasunngornermi atsiorpaat.

EU-Kommissionip siulittaasuata Ursula von der Leyenip, EU-llu præsidentiata Charles Michelip isumaqatigiissut Bruxellesimi ullaap tungaani nalunaaqutaq qulinut qiteqquttoq atsiorpaat.

AAMMA ATUARUK Tuluit EU-llu isumaqatigiinneratigut Franskit aalisarnerat taperserneqartoq

Pappilissat atsiorneqartut tuluit illersornissaqarfiata Royal Air Forcep timmisartuanik kingorna Londoniliaanneqassapput, tuluillu ministeriuneranit Boris Johnsonimit atsiorneqassallutik.

Isumaqatigiissut tuluit inatsisartuini ullumi pingasunngornermi oqallisigineqassaaq, sivisungaatsiartumillu oqallittoqarnissaa naatsorsuutigineqarpoq, underhusimi overhusimilu arlaleriarluni kingorna taava taasisoqassalluni.

Tuluit Nunaat EU-mi decembarip ulluisa 31-anni ilaasortaajunnaassaaq.