EU-mi qinigaq: EU-mut eqqusseqqusiunnaarneq iluaqutaassaaq

Puisit amiinik suliat eqqunneqarsinnaajunnaarnerannut EU Parlamentimi ilaasortaq Christel Schaldemose akuerseqaavoq.
maajip 07-at 2009 11:39

Isumaqarpoq naggueqatigiit Inuit mianeralugit aalajangiineq Kalaallit Nunaata iluaqutigiinnassagaa.

- Ernumasoqarnera paasisinnaalluarpara. Allatut oqaruma sallussaanga, EU Parlamentimi ilaasortaq qallunaaq Christel Schaldemose oqarpoq.

- Ilimagilluinnarpara ukiup ataatsip ingerlanerani oqallinneq sakkukillippat aalajangiineq Kalaallit Nunaata iluaqutigilissagaa. Siunissap qaninnerup ingerlanerani aalajangersagaq naggueqatigiit Inuit iluaqutigissavaat, tamanit ilisimaneqalissammat puisit amii tunisat naggueqatigiit Inuit kisimik tunisarigaat. Christel Schaldemose aperineqarami aalajangerneq pisuusaaarnerunnginnersoq, ilisimaneqarmammi uumasuutitik ajorluinnartumik atugassaqartikkaat. Akivoq soorunami EU Parlamentimi sulinerminni uumasut allat atugaat pillugit suliaqartarlutik; soorlu ungasissunut uumasunik angallassisarnerit, uumasuutaasivinnilu uumasut atugarisaat malittarilluaritik; taamaammat oqartoqarsinnaanngitsoq pisuusaartoqartoq.

Aperineqaramilu namminneq nunaminni uumasut atugarisaat pillugit naammattunik suliassaqannginnersut, soorlu Inuit puisinniariaasiat taamarsuaq taannerineraat, akivoq:

- Æææh, paasisinnaasoraara suna pinerit. Inuppassuimmi puisit iserujussui kusagalugit, toqoraariaaserlu amiilaarnartoq akerleralu illersuilersarput. Ilumoorpoq inuppassuit taamaattunik takugaamik nalligusulersarnerat.

Christel Schaldemosep immikkoortinneqartariaqarnerarpaa Canadap sineriaani avaartaalluni puiseeqqanik toqoraasarneq, pisussaatitaasariaqarlutillu iliuuseqarnissaminnut.