EU-mi puisit amii pillugu siunnersuisooqatigiit saqqummeeqqipput
Tamanna pivoq siunnersuisooqatigiit EU-p inatsisartuini ilaasortanik, Bruxellesimi sisamanngormat marsip 26-anni ataatsimeeqateqarnerisa nalaani. Tassani piumasarineqarluni puisit amiinik EU-mut eqqussuinerup killilersorneqarnerata atorunnaarsinneqarnissaa, Nunat Avannarliit Killiit siunnersuisooqatigiivi tusagassiutinut nalunaarumminni ullumi allapput.
- Puisit amiinik EU-mut eqqussuinerup killersorneqarnera EU-mit atorunnaarsinneqanngippat, EU Issittumi pitsaasumik suleqataanera uppernarunnaassaaq, siunnersuisooqatigiit allapput.
Nunat Avannarliit Killiit siunnersuisooqatigiivisa ilisimaraat, puisit amiisa EU-mut tunisassiarineqarnerisa killilersorneqarnerinut atatillugu, Inuit pineqannginnissaat, nunat tamalaat niuernikkut suleqatigiiffissuani, WTO-p eqqartuussiviani paasineqarsimammat tamassuma ilaa inatsisinik unioqqutitsinerusoq.
Nunat Avannarliit Killiit siunnersuisooqatigiivisa EU-mi ilaasortanik ataatsimeeqateqarenranni saqqummiisuuvoq, Inatsisartuni ilaasortaq, Randi V. Evaldsen, taanna peqataasoq siunnersuisooqatigiit siulittaasuata tulliata, Lars-Emil Johansenip peqatataannginnerani. Randi V. Evaldsenip saqqummiinermini oqaatigaa, paasisimallugu puisit amiinik EU-mut eqqusseqqusiunnaavinnissaq EU-mit eqqarsaasersorfigineqarsimasoq aammaarlunilu Randi V. Evaldsenip naqissuserpaa, Kalaallit Nunaanni pisuussutit uumassusillit uumassuseqanngitsullu kalaallinit iluaqutigineqarnissaat pisinnaatitaaffiummat.
- Puisinniartarnerup nungusaataanngitsumik Kalaallit Nunanni ingerlanneqartarnera pillugu paasisitsiniaanerit nalunaarusiornerillu arlallit kalaallit nukinnik atuiffigisareerpaat, Randi V. Evaldsen saqqummiinermini ilaatigut oqarpoq, EU-milu politikerit ataatsimeeqataasut, ilaatigut Danmarkimi Dansk Folkepartiip ilaasortaatitaa, Jørn Dorhman aamma Norgep EU-mi ilaasortaatitaa uumasunik illersuinermi siuttuusut ilaat, Marit Paulsen tusarnaartoralugit.
- Puisit pillugit EU-mi innuttaasut allatut eqqarsalersinneqarnissaat siunertaralugu paasisitsiniaanerit ingerlanniarsigit. Taamaaliunngikkusi Issittumi EU-p suleqataanerata uppernassusaa apeqquserneqartariaqassaaq, Nunat Avannarliit Killiit siunnersuisooqatigiivini sinniisutut ataatsimeeqataasoq, Randi V. Evaldsen kaammattuuteqarluni taama oqarpoq.
