EU-mi najugallit angalagaangamik akikinnermik oqaluussisinnaanngortut
Danmarkimi EU-milu oqarasuaatit atoraluarukku ukiut marluk qaangiuppata akigitinneqartoq taamaaginnassaaq.
Nunat EU-mut ilaasortat ataasinngormat unnukkut isumaqatigiipput nunagisamit nunanut allanut sianernermi akitsuutit EU-mi nunani ilaasortani atorunnaarsikkallarniarlugit.
Atorunnaarsitsigallarneq 2017-imi juunip tungaanut atuutissaasoq, EU-mi siulittaasuuffimmik tigummiagaqartut Letlandimiut tusagassiutinut taama nalunaaruteqarnerarlugit Reutersimit issuarneqarput.
- Nunatsinni akiusoq atorlugu nunanut allanut sianernermi akitsuut EU-mi peerneqassasoq juunip 15-anni 2017-imit atuuttussatut isumaqatigiissutigineqarpoq, Letlandimiut taama allapput.
Aamma atuaruk Hardenbergip oqarasuaatinut internetimullu 132.000 koruunit atorsimavai
EU-mi nunani ilaasortani tamani akikillisaanerit nunatsinni atuutsilernissaat Tele-Postip sulissutigaa, suliffeqarfiullu kajumissutsiminik EU-mi inatsisissat malinnaaviginiarpaat, Tele-Postimi attaveqaqatigiinnermut pisortaq, Ivalo Egede KNR-imut nalunaarpoq.
Taassumalu maluginiaqquaa Nunarput EU-mut ilasortaanngimmat, EU-mi nunani ilaasortani akiusoq atorlugu nunanut allanut sianernermi inatsit nunatsinni TELE-POST-imi atuutinngilaq. Taamaammat EU-mi attaveqaqatigiit akikinnerulersitsinissamut TELE-POST-imut isumaqatigiissuteqassanerlutik namminneq aalajangissavaat.
- Polenimi, Hollandimi, Belgiami Italiamilu aasap ingerlanerani EU-p attaveqaatikkut akikilliliissutai atuutsinneqalissasut, Ivalo Egedep oqaluttuaraa.
USA-mi Canada-milu attaveqaatinik ingerlatsisut tamarmik EU-p akikilliliissutai atulissavaat. EU-milu ilaasortat ukiaru amerlanerit tamanna atulissavaat. Nunat allat EU-p attaveqaatitigut akikilliliineranut peqataalersimanersut, TELE-POST-ip nittartagaani tele.gl-imi nutartertuartumi malinnaavigineqarsinnaapput.
