EU-mi ilaasortat Kalaallit Nunaannik akornusiinialerunarput
Europa pillugu ataatsimiititaliap ataatsimiinginnerani paasissutissat tunniunneqartut naapertorlugit, Danmarki akerliugaluarpalluunniit ilaasortat amerlanerussuteqartut siorna pisutut akornusiissagunartut, Piniarnermut aalisarnermullu naalakkersuisoqarfimmi pisortaq, Amalie Jessen oqarpoq.
Amalie Jessen siullermik aperaarput marsip qaammataani IWC-mi isumaqatigiiniarnissami EU-mi ilaasortat Kalaallit kissaataannut akerliunerat qanoq sunniuteqassanersoq.
- IWC-mi siorna ataatsimiinnerup nalaani EU-mi ilaasortat isummaminnik ataatsimut saqqummiussinerannik pissuteqartumik Kalaallit Nunaata piumasaqaatini qipoqqartassinneqarnissamut iluatsinngotsoorai. 2009-mi aamma ukiunilu tuliuttuni aamma attatiinnarneqassappat taava soorunami kattuffissuarmi ajortoqavissimassaaq. Tamanna eqqarsarnartoqarpoq. Kalaallit Nunaata piumasaqaataanik ilumut naammassinnissinnaanersoq apeqqutaalissalluni, Amalie Jessen oqarpoq.
Taamatut Amalie Jessenip kattuffissuup naaperluittuilluartumik aalajangiisinnaaneranik apeqqusiinera pissuteqarpoq, kalaallit arfattassinneqarnissaminnik piumasarisaat, ilisimatuussutsikkut misissuinerit naapertorlugit akornutissaqartinneqartussaanngikkaluarnerat.
Arfanniarneq pillugu siorna ataatsimiinnerup kingorna Aalisarnermut piniarnermullu naalakkersuisup, Finn Karlsenip, nunanut allanut ministereqarfik qinnuigaa, Nunatta IWC-miit ilaasortaajunnaarsinnaanera misissoqqullugu, tamannalu suli suliarineqarpoq.
