EU kukkusimavoq

Raajat qalipaajakkat Kalaallit Nunaata EU-mut niuerutigisartagai EU-mi peqqussutip kukkuneqarsimanera pissutigalugu nunatsinnut annaasaqaataassasoq, aviisi Jyllands-Posten allappoq.

Tamatuma niuernikkut annaasaqaataasinnaanera ataasinngorpamiit nakkutigineqaqqissaassasoq aviisip allaaseraa. EU-llu ataatsimiititaliaa iliuuseqarnissamik piareersimasoq aammattaaq eqqaaneqarpoq.

Taamatuttaaq EU-p Aasiap kangisissuani aalisartut Tsunami-mik ajunaarnersuaqarmat eqqugaasimasut qajassuunneqarnissaat pinerullugu aalisakkat nunani kiattuni uumasut tunisaanerisa akitsuutaat annikilliliivigineqarsimagaluarput, kukkusoqarsimammalli canadamiut raajaasa akitsuutaannik annikilliliisoqarsimavoq. Canadalu tassaavoq Kalaallit Nunaannut tamatumunnga unammillertaanerpaaq.

Nunatsinni Aalisariutinik Piginneqatigiiffiit Kattuffiata APK-p pisortaa Peder Munch Pedersen oqarpoq, nunatsinni avammut niuernermi tamanna ukiup sinneranut 45-niit 50 mio. koruunit missaanni annaasaqaataasinnaasoq.

Tamannarpiarlu pissutigerpiarlugu Danmarkimi nunanut allanut ministeriaqarfik peqqusivoq, ataasinngorpamiit Kalaallit Nuaata raajanik avammut niuernera nakkutigineqaqqissaassasoq.