EU issittumi peqataanerusariaqarpoq
Issittumi umiarsuit angallannerat annertusiartorpoq. 2010-mi umiarsuit qulit aqqut The Northern Sea Route atorlugu Europamiit Asiamut Ruslandip sineriaatigut ingerlaarput. 2011-mi umiarsuit 34-it aqqut taanna atorpaat ukiormannalu taakku marloriaataat tamaanaaqquutissangatinneqarput.
Periarfissat tamakku takkunnerisigut qularnarunnaarpoq EU-mi aningaasarsiornermut issittup pingaaruteqaleriartornera. Pisullu tamakku aamma akisussaaffimmik nassataqartussaapput. Qulakkeerniarneqarpoq umiarsuit angallannerisa kinguneranik imaluunniit uuliasiornerup kinguneranik mingutsitsinerup pinaveersimatinnissaa. Tamakku issittumi naasut uumasullu akornuserujussuarsinnaagai EU-mi imarsiornermut aalisarnermullu kommissæri Maria Damanaki isumaqarpoq, taannalu ullumi aallartittumik Nunatsinni tikeraarpoq.
Issittumi takornariaqarneq annertusiartorpoq tamatumalu sillimaniarnermut piumasaqaatit nassatarai. Sillimaniarnermut upalungaarsimaneq annertoorujussuaq pisariaqartinneqarpoq taannalu nunat ataasiakkaarlutik kivissinnaanngilaat. Taamaammat siunissaq pillugu suleqatigiinnissaq pinngitsoorneqarsinnaanngilaq.
Issittumi naalagaaffiit issittullu imartaanik atuisut suleqatigiinnissaat aqqutiginiarneqarpoq sillimaniarnerup sukaternissaanut. Taassuma saniatigut sillimaniarnermut issittumi piumasaqaatit annertuut avaqqunneqarsinnaanngillat. Tamakkulu atuutsinniarnissaat suliassaavoq annertoorujussuaq. Taamaammat Europami nunat peqatigiissut EU-mi isumaqarput issittoq pillugu nunarsuup sinnera aamma peqataasariaqartoq. EU issittumi nunanik pingasunik Islandilu ilanngutissagaanni sisamanik suleqateqarpoq. Ukiut qulit kingulliit ingerlaneranni EU issittumi ilisimatusarnermut 200 millioner euro-nik aningaasaliissuteqartarsimavoq. Issittumilu ineriartortitsinermut EU aningaasaliisartuni sallersaavoq. Suliniutinut tamakkununnga 1.140.000 eurot atorneqarsimasut EU-mi kommissæri Maria Damanaki Nunatsinnut tikeraanngilaarnermini ilisimatitsivoq.
Issittumi siunissaq nunarsuup sinneraniittut tamaasa sunnertussaavai. Maannalu tassa piffissanngorpoq unammilligassap aallartinnissaanut. Akisussaaneq, ataatsimoorneq aalajangersinnaassuserlu atorlugit.
