EU Islandimut isumaqatiginninniarnissaminut piareerpoq

Ataatsimiinneq siulleq aqagu periissaaq, kingullerli immaqa aatsaat 2012-imi upernaakkut Danmarkip EU-mut siulittaasunngornerani qallunaat siuttuunerisa nalaanni ingerlanneqarsinnaassalluni.

Danmarki taamaalilluni Islandip EU-mi ilaasortanngorniarnera pillugu pingaarutilimmik inississinnaavoq.

- Neriuutigaarput qallunaat siulittaasuuneranni isumaqatiginninniarnerit naammassiumaarlugit. Tamatigulli akornutissaqartuaannartarpoq iluarsineqartussanik, Nunanut allanut ministereqarfimmi pisortaq Michael Zilmer-Johns nunanut allanut ministerip Lene Espersenip ataatsimiinnermi peqataannginnerani Danmarki sinnerlugu peqataasoq oqarpoq.

Isumaqatiginninniarnerni akornutissat pingaarnerit tassaassangatinneqarput aningaaseriviup Icesave-p 2008-mi ajalusoornerata kingornatigut pisut. Aammattaarli suliassaqarfiit soorlu nunalerineq, aalisarneq arfanniarnerlu Islandip allatut ajornartumik EU-p malittarisassaanut naleqqussarnermini annertuumik allannguuteqartittariaqassavai.

Islandimi innuttaasut EU-mi ilaasortanngornissamut piumassuseqannginnerat naggataatigut akornutissat annersarilersinnaavaat.

Isumasiuinerit paasinarsisippaat Islandimiut amerlanerussuteqartut ilaasortanngornissamik qinnuteqaatip naalakkersuisunit utertinneqarnissaa piumanerugaluaraat, tamannalu EU-mi suleriaatsimi isumakululersitsilluni.

- Suut tamarmik iluatsissappata tamatumani Islandimi innuttaasut tapersersuinissaat pisariaqarpoq, Belgiami EU-mut siulittaasoqarfimmit nunanut allanut ministeri Steven Vanackere oqarpoq.

Isumaqatiginninniarnerit naammassippata Islandimiut EU-mut ilaasortanngornissaq pillugu taasitinneqassapput.