EU ilinniartitaanikkut aningaasaliivoq

2010-p ingerlanerani Nunatta karsia 200 million koruuninit EU-mit aningaasanik pissaaq. Ilinniartitaanerup aningaasaliiffigineqarnissaa EU-p peqataaffigissagaa isumaqatigiinnermi tallimanngormat atsioqatigiippoq.

Aningaasarpassuit pineqassappata Kalaallit Nunaanni ilinniatitaaneq siunertaqartumik ingerlanneqassaaq.

Siorna paasiniaanerit malissagaanni piumasaqaatit akuerineqarnissaat qularnanngilaq. Tassami siorna Kalaallit Nunaata siunniussatut anguniagaasa 97 procentii anguneqarsimapput, taama nalunaruteqarput Ilinniartitaaneq pillugu qullersaqarfik.

Kalaallit Nunaat EU-lu 2007-mi isumaqatigiipput, 2013-ip tungaanut EU imminut pisussaaffilissasoq ukiut tamaasa 200 million koruuninit Kalaallit Nunaannut tunniussisassasoq. Taakku aningaasat ilinniagaqarnermut atorneqartassasut isumaqatigiissutaalluni.

Ukioq manna aningaasat tunniussassat pillugit tallimanngormat atsioqatigiittoqarpoq. Atsiortuupput Kalaallit Nunaanniit Lida Skifte Lennert EU-llu kommissioniata pisortaa Gary Quince.

Suleqatigiinnermik isumaqatigiissut ulluni makkunani nalilersorneqarpoq. 2014-miit 2020-mut isumaqatigiissut atuuttussaq aappaagu isumaqatigiissusiorfigineqassaaq.

Ukiumut 320 million koruuninik EU nunatsinnut tapiisuteqartarpooq. Assigaai Namminersorlutik Oqartussat aningaasat isertitagaasa 5,3 procentii.