EU aatsitassarsiornermut tapersersuisoqquaa

Kujataa aatsitassanik qaqutigoortunik Nunarsuarmi peqarnerpaanut ilaavoq, EU-milu ilasortat tamakkuninnga ilangeerusupput. Aatsitassallu taakkua pillugit isumaqatigiissusiornissaq nukinginnarsisoq Europa Parlamentimi ilaasortaq, Bendt Bendtsen, isumaqarpoq:

- Europami suliffiissuit aatsitassanik Kalallit Nunaanneersunik pissarsisinnaanissaat qulakkeerniarlugu, EU-kommissionip Kalaallit Nunaanni Namminersorlutik Oqartussat isumaqatigiinniarfigilertariaqarpaat, Bendt Bendtsen Berlingske Businessimut oqarpoq.

Taanna danskit inuussutissarsiornermut ministererisimasaat Europa-parlamentip suliffissuaqarnermut ataatsimiititaliaani ilaasortaavoq. Suliffisuaqarnermut Ataatimititaliaq aatsitassat pillugit nalunaarusiami inassuteqarpoq, EU-p Nunattalu peqatigiillutik suleqatigiinissamut isumaqatigiissutaat annertusarneqassasoq, Nunatsinni aatsitassat qaqutigoortut taamaalillutik allanik pissarsiarneqannginniassammata.

- Piginneqatigiiffiit Australiameersut Kalallit Nunaanni aatsitassanik qaqutigoortunik ujarlernissamut akuersissuteqareerput, aammalu Kinamiut soqutiginnereerlutik. Kinamiut australiamiullu ingiarluta Kalaallit Nunaanni aatsitassanik piiaalinnginnissaat, EU-p qulakkeertariaqarpaa, Bendt Bendtsen oqarpoq, erseqqissarlugulu EU-p Kalaallit Nunaatalu isumaqatigiinnialernissaat nukinginnartoq.

Bendt Bendtsenip saqqummiussaa pillugu Naalakkersuisut Siulittaasuata Naalakkersuisoqarfiani pisortaq, Peter Schultz, utaqqimaaqqusivoq:

- EU-mut isumaqatigiinnialinnginnermi, kalaallit politikkeriisa matumunnga qanoq isummernissartik eqqarsaatigilluaqqaassavaat. Taava suliassaq EU-mi aatsaat suliarineqalissaaq, Peter Schultz Berlingske Businessimut oqarpoq.

Kalaallit Nunaat EU-lu aalisarneq pillugu peqatigiilluni suleqatigiinissamut isumaqatigiissuteqareerput. EU taamaalilluni ilaatigut aalisarnermut isumaqatigiissut tunngavigalugu Nunatsinnut ukiumut 330 millioni koruunit missaannik akiliisarpoq.