ESU-mit taperneqartuarnissaq pisariaqartippaat
Inuussutissarsiornermut tapiisarnermi ukiumut taarsigassarsiaritinneqartartut ukiormannamiit ikiliartuinnartussaasut 2006-imut inatsisartut aningaasanut inatsisissatut siunnersuutaanni allassimavoq. Savaatillit isumaqarput aalisarnermut, piniarnermut savaateqarnermullu tapiissutit ikilinissaat, naalakkersuisut siulittaasuata ukiortaami ineriartortitseqataanissaminnik oqaaserisaanut, naapertuutinngitsoq. Savaatillit Peqatigiit Suleqatigiissut siulittaasuat Niels Lund ima oqarpoq:
- Ukiuni kingullerni Erhvervsstøttemi aningaasalersuutit ikiliartornerat uagutsinnut kipiluttunartumik kinguneqariartorpoq. Savaateqarneq nunalerineq eqqarsaatigalugu ESU aningaasaliisussatut periarfissatuaraarput.
ESU-mit aningaasaliissutit siorna 8,4 millioniusimapput. Ukiormanna 6,7 milliuuniussallutik, missingersuutillu malillugit 2007-imi, 8-mi 9-milu 2,1 million 2,5 million koruunillu akornaniissapput.
Savaatillit savaateqarneq imminut akilersinnaalerniassappat savaaqqanik ukiumut 26.000-inik toqoraanissaq 2012-p tungaanut anguniartussaavaat, tamannalu tapiissuteqartigani angujuminaassasoq, Niels Lund isumaqarpoq.
- Piorsaanerit annertusaanerillu ingerlassappata aningaasanik tamarmik naleqarput. Narsaasiornerit pisariaqartinneqarput, narsaatinut maskiinat maskiinat atorfissaqartinneqarput. Uumasuutinik amerliliissagaanni inaatit allineqarlutillu pitsanngorsartariaqarput. Taamaattumik aningaasaliisoqartariaqarpoq anguniakkagut angussagutsigit. 0’45
ESU-p avataatigut allamik taarsigassarsisitsisinnaasumik savaatillit nassaarsimanngillat, naak Danmarki angullugu ujarlertaraluarlutik. Ajornartorsiutaalli taannaannaanngilaq. ESU-mit tapiissutit tigunissaat ukioq sinnerlugu utaqqisariaqarsinnaasarpaat.
- Ukioq kingulleq aningaasassararutsinneqarsimapput taamaalillutillu ukioq ataaseq imaluunniit ukiup aappaa affaq missiliorlugu savaatillit isertitassamittut naatsorsuutigisaraluatik maannamut aaqqinneqarsimanngillat, uggornartumik. Taamaattumik, akisussaasunut saaffiginnippugut, suliassat ingerlapput, neriulluta paasinnillutik tamakku aaqqikkumaaraat.
Niels Lundip ilisimatitsissutigaa susassaqartunut allakkatik kinguneqalerunartut. Naalakkersuisunit neriorsorneqarsimapput inatsisartut upernaakkut ataatsimiilinnginnerani ataatsimeeqatigineqarumaarlutik. Namminersornerullutik Oqartussanit oqaaseqartitsiniaraluaratta ullo’qeqqata siornagut iluatsinngilarput.
