Espersenip atuisimanini pillugu inissinneqarpoq
Danmarkimi inatsiseqarnermut ministeri Lene Espersen ukioq 2001-imi ministerinngoqqammerluni sulisuminut aqqaneq marlunnut Københavnimi neriniartarfimmi akimasuumi Era Ora-mi julefrokostertitsisimavoq 19.330 koruunit nalinginut, tamannalu pillugu Lene Espersen Naalagaaffiup Kukkunersiuisartuinit naveerneqarsimasoq, aviisi Politiken allaaserinnippoq.
Lene Espersenip julefrokostertitsisimanera Farummimi borgmesteriusimasup Brixtoftip akileraartartut akileraarutaannik atuipilussimaneranut assersuunneqarpoq.
Inatsiseqarnermut ministeriaqarfimmit nassuerutigineqarpoq taama nerisitsisimaneq inummut ataatsimut 1.500 koruuninik naleqartoq naliginnaasumik julefrokostertarnernit marloriaammik akisunerusimasoq.
Naalagaaffiup Kukkunersiuisartoqarfianit oqaatigineqarpoq ministerit taama nerisitsisarnerinut aningaasartuutinut immikkut killeqartitsisoqarneq ajortoq. Lene Espersen pineqartumut oqaaseqarumasimanngilaq.
