Espersen: Suleqatigiinneq pitsaasoq ingerlaannassaaq

Konservativini siulittaasunngortup Lene Espersenip, Kalaallit Nunaannik suleqateqarnerup pitsaasup ingerlaannarnissaa neriorsuutigaa.
septembarip 10-at 2008 08:08

- Kalaallit Nunaanni suleqatigisatta suleqatigiuarnissaat ingerlaannassaaq. Siorna aasakkut ataatsimeersuarnitsinni Kalaallit peqataatitaat ilagigatsigit nuannerluinnarpoq ikinngutitaariortoratsigit. Kalaallit Nunaannut attaveqarnitta pitsaasuujuarnissaa naatsorsuutigaara, Lene Espersen oqarpoq.

Kalaallit Nunaanni Demokraatit, Det Konservative Folkepartimik, siorna suleqatigiinnissamut isumaqatigiissuteqarput. Demokraatillu siulittaasuat, Jens B. Frederiksen, ullumi Radioaviisimut oqarpoq Lene Espersen, Bendt Bendtsenip taartissaatut piukkunnarnerpaasoq. Jens B. Frederiksenip siulittaasunngortoq ullup ingerlanerani atassuteqarfigalugu pilluaqqussamaarnerarpaa.