Espersen oqaaseqarfiginianngikkallarpaat

Danmarkimi inatsiseqarnermut ministerip Lene Espersenip nunatta Canadamit puisit amersisaleqqissinnaanissaanut naalakkersuisut siunniussinerannut akerlilersuilluni sapaatip-akunnerani kingullermi TV-Avisikkut saqqummiussineranut nunatsinni puisinniarnermik inuussutissarsiornermut oqartussaanerpaasut tassalu naalakkersuisut manna tikillugu oqaaseqarumanngillat.

Danmarkimi inatsiseqarnermut naalakkersuisoq Lene Espersen pingasunngormat TV-Avisimi oqarpoq, nunatta Canadamit puisit amersisaleqqinniarnera ajorluinnartuusoq. Canadami puisinik avaartaalluni piniartarneq uumasunik killeqanngitsumik naalliutsitsinerunerariarlugu Espersenip neriuutiginerarpaa, nunatta tusaamanerlungaalinnginnissaa pillugu naalakkersuisut aalajangernertik eqqarsaatigeqqikkumaaraat. Aamma oqarpoq nunatsinni naalakkersuisut Canadamiut avaartaallutik puisinniartarnerannut akerliullutik ukioq pisiumajunnaariarlutik kingorna pisiumaqqilernerat nunatta uppernassusaanut aningaasarsiorneranullu innarliisussanngortoq.

Espersenip taama oqaaseqarnera nunarput sinnerlugu Folketingimi ilaasortap aappaata IA-meersup Kuupik Kleistip aamma Inatsisartut Piniarnermut Ataatsimiititaliaanni siulittaasup Ane Hansenip IA-meersup kiisalu KNAPK-mi siulittaasup Peter Olsenip akueriumanngilluinnarpaat, naalakkersuisullu iliuuseqaqqullugit kaammattuuteqarfigaat.

Naalakkersuisut siulittaasuat Hans Enoksen oqarpoq Piniarnermut Naalakkersuisoq Finn Karlsen pineqartumut oqaaseqartussaasoq, Finn Karlsenillu avanersuarmi maanna angalasup pissarsiariniarnera aamma ajornaatsuinnaanngilaq, oqarasuaatit taavunga attavilummata. Allattaa attaveqarfigigatsinni oqarpoq Piniarnermut Naalakkersuisoq oqaaseqarnianngikkallartoq.