Espersen Clintonip isumaqatiginngilaa
Danskit naalakkersuisuisa "nalilersuilluni ataatsimiinnertut" taagaat, USA-mi nunanut allanut ministeri isumaqarpoq, peqataanissaq pisariaqarluinnarsimasoq.
USA-mi nunanut allanut ministeqarfimmi avammut oqaaseqartartup nutaarsiassaqartitsivimmut Ritzauimut tamanna naqissuserpaa.
- Ataatsimiinnerup pingaaruteqarluinnassusia Hillary Clintonip paasisimallugu siumungaaq oqaatigaa, aamma nunat ataatsimut soqutigisaat ataatsimiinnermi misissorneqarnissaat periarfissarsiorneqarniassammat, avammut oqaaseqartartoq oqarpoq.
- Ataatsimiinnermi isuma aamma allanngunngilaq. Oqaloqatigiinnerit pissarsiviulluarput, oqarpoq, aamma tikkuarlugu, Issittumi Siunnersuisoqatigiit ataatsimiinnerisa nalaani Hillary Clinton ulapittorujussuusimasoq.
Lene Espersen ataatsimeeqataanani ilaquttani Spaniami Mallorcamut sulinngiffeqarluni angalaqatigerusunnerullugit ataatsimeeqataanngimmat assut isornartorsiorneqarpoq. Inatsisinut atortitsinermut ministeri Lars Barfoed Danmark sinnerlugu ataatsimeeqataavoq.
Nunat Issittumut sineriallit ataatsimiinnerat Norgimi nunanut allanut ministerip, Jonas Gahr Størep, ima pingaaruteqarnerartigaa, nammineq taama ataatsimiittoqartillugu qaquguluunniit sulinngiffeqarnaviarnani. Naalakkersuisut siulittaasuat Kuupik Kleist, tamatumunnga isumaqataavoq.