Espersen: Canadamit amerseqqittalernersi ajorluinnarpoq
Nunatta puisit amiinik Canadameersunik pisisaqqittalernissaanik Naalakkersuisut aalajangernerata kingunerisaanik, Danmarki sinnerlugu EU-mi ilaasortaq, uumasunillu illersuiniarnermik suliniuteqartoq Gitte Seeberg, puisit amiinik nunatsinneersunik pisiumajunnaaqqusilluni inatsivoq. Gitte Seebergip taama inatsinera Danmarkimi inatsiseqarnermut ministerip Lene Espersenip isumaqatigalugu nunatsinut sakkortuumik isornartorsiuivoq:
-Ajorluinnarpoq, uumasunik killeqanngitsumik naalliutsitsineruvoq, neriuppungalu Kalaallit Nunaanni Namminersornerullutik Oqartussat, tusaamanerlugaalinngissartik pillugu eqqarsaqqikkumaartut, tassami Canadamit taama eqqussueqqilissagunik tusaamanerlugaalissapput, inatsiseqarnermut ministeri Lene Espersen TV-Avisimut ippassaani maajip 24-iani oqarpoq.
Danmarki sinnerlugu EU-mi ilaasortaq Gitte Seeberg uumasunik illersuiniarnermik aamma suliniuteqartuusoq oqarpoq, nunatta puisit amiinik Canadameersunik pisisalernera pissutigalugu nammineq uumasunik illersuiniartuugami puisit amiinik nunatsinneersunik piseqqinnaviarani.
Gitte Seebergip Lene Espersenillu taama sakkortuumik uparuaateqarnerat, Canadamiut puiseeqqanik avaartaallutik puisinniartarnerannut akerliulluni nunatta ukioq pisiumajunnaarluni nalunaariarluni kingorna pisiniaqqittalernissamik aalajangerneranik tunngaveqarpoq.
Nunarput politikkikkut nalorninartumut inissisinnaavoq, tassami Canadamiut puisiittasa amiinik eqqussueqqusiunnaarnissaq EU-mi maanna suliniutigineqalereermat.
- Puisit amiinik Kalaallit Nunaaneersumik siornagut pisinermi puisip qanoq pisarineqarsimanera nalornissutaaneq ajorpoq, massakkulli ammit suminngaannneerpiarnersut nalunarsippata eqqussueqqusiunnaarnissap tapersersorneqarnissaa qularnanngilaq, Gitte Seeberg oqarpoq,
tamatumunngalu Lene Espersen isumaqataavoq.
-Kalaallit Nunaata aningaasarsiorneranut iluaqutaasumik puisit amiinik avammut tunisassiorneq innarlerneqarsinnaavoq, minnerunngitsumik uppernassutsikkut ileqqorissaarnikkullu inissisimaneq innarlerneqassalluni, Lene Espersen TV-Avisimut oqarpoq.
Puisit amiinik eqqusseqqusiunnaartoqarsinnaanera nunanut allanut ministeriaqarfimmit maanna misissorneqarpoq. Nunatta Danmarkillu akornanni nunanut allanut tunngasunut sillimaniarnermullu ataatsimiititaliami atorfilittat ataatsimiititaliaat, Kleist Federspielimik taaguuteqartoq, Nuummi juunip arfineq-pingajuanni ataatsimiileruni Lenes Espersenip oqaaseqarsimaneranut akissuteqarnissamik suliaqassaaq.
Piniarnermut Pisortaqarfik, nunanut allanut ministeriaqarfik aqqutigalugu, Folketingimut ilaasortanut paasissutissanik puisit amiinut nunatsinneersunut tunngasunik maanna nassitsereersoq, pisortaaneq Amalie Jessen ilisimatitsivoq.
Naalakkersuisut siulittaasuat Hans Enoksen oqaaseqartinniaraluaratsigu iluatsinngilarput.
