Esperanza Nuummut ingerlaarpoq
Nuummi umiarsualiviup pisortaata Taitsiannguaq Olsenip oqaatigaa, Esperanzap tikinnissani ippassarli nalunaarutigigaa, talittarfimmulli talinnani Nuup umiarsualiviata avataani Qinngutta Paavanut kisariartussangatinneqarluni.
Ullumi siusinnerusukkut Esperanza sumiissusersineqarsinnaanngilaq, qularnanngitsumik qarasaasiakkut nassitsissutini qamissimammagu. Nassitsissut atorlugu qaammataasakkut sumiinnera paasineqarsinnaasaraluarpoq.
Mads Flarup Christensenip Greenpeacemeersup, Esperanzap ullumikkut Nuummut tikinnissaa ilumoornerarpaa.
- Umiarsuaq taquassarsiniarlunilu amerlanerusunik inuttalerneqassaaq, taava ullumi aqaguluunniit ingerlaqqissalluni, Mads Flarup Christensen KNR-imut oqarpoq.
- Uuliamik qillerisoqannginnissaa pillugu Greenpeacep suliniutaa 'Go beyond oil' naapertorlugu Esperanza ingerlaqqissaaq, taamaattorli Nuummiit sumut ingerlaqqissanersugut suli aalajangerneqanngilaq, Mads Flarup Christensen oqarpoq. Tamatumunngalu atatillugu erseqqissarlugu umiarsuaq Nuummiit ingerlaqqikkuni suliniutiminik ingerlatitseqqissasoq, matumani nakuuserneqartaqanngitsumik eqqissisimasumillu iliuuseqartassalluni.
Kangilinnguani sakkutooqarfiup qulimiguuliata Aasianni mittarfimmut ippassaq minnera Niels Flarup Christensenip oqaaseqarfigerusunngilaa.
- Pisortaqarfiit assigiinngitsut qanoq iliuuseqarnerat uagut akuliuffigineq ajorpavut, Mads Flarup Christensen oqarpoq.
Jan Bøgstedip Kangilinnguani sakkutooqarfimmeersup ilumoornerarpaa, sakkutooqarfiup qulimiguulia Qeqertarsuup Tunuaniimmat, taamaattorli qulimiguullip sooq Aasiannut ippassaq minnera oqaaseqarfigerusunnagu. Naak Aasianni sapaatip akunnerata aallartinnerani politiit ulapputtut takuneqarsinnagaluartoq.
