Esmar Bergstrømimik suleqateqarneq ilungersunarsimavoq

Esmar Bergstrømip Demokraatit politikkiat saneqqullugu nammineerluni oqaaseqartarnera Inatsisartunilu Demokraatit sinnerlugit ilaasortaatitat ataatsimiittarnerini peqataasannginnera pissutigalugu Demokraatit siulittaasuata Per Berthelsenip allaffigisimasimagini oqarpoq. Esmar Bergstrøm allagarsinermi kingorna nalunaarpoq Demokraatinit anilluni. Esmar Bergstrømip aninera Per Berthelsenip ima tunngaveqartippaa:

- Uani aaqqigianngissuteqarnermi aallaviuvoq, partiimut sinniisuugaanni minnerunngitsumillu sammivinni assigiinngitsuni oqaaseqartartuugaanni, pitsaassutsimik minnerpaaffiligaasumik takutitsisinnaassuseqarnissaq, tamanna Esmar Bergstrøm-imut artorsaataasimavoq. Per Barthelsen nangippoq:

- Immaqa naqisimaneqarnertut tamanna misigasarsimassavaa saqqummiunniakkaminik ilaatigut inorsartarnini. Taamaalillunilu puullaaqinera ima annertutigilersimagunarpoq ulaakkut ataatsiminiinngut nuannerunnaariartorsimallutik. Malunnartumik matoqqasumik pissuseqarluni ilaatigullu nalunaaqqaarani takkutinngitsoortarnera peqqatigalugu.

Per Berthelsen aamma oqarpoq partiimi isumaqatigiissutaasut avaqqullugit Esmar Bergstrøn oqaaseqaqattaartarsimasoq. Naak Demokraatit Inatsisartuni ilaasortaatitaat ullaakkut piareersarnerminni oqaaseqaatissani ilanngutassat piigassallu isumaqatigiissutigereertaraluaraat, Bergstrømip agginngitsoortarnini pissutigalugu oqaaseqarnermini piikkat ilannguttarsimagai Per Berthelsen oqarpoq.

- Taamalilluni kattusseqatigiittut sulisutut isikkoqartissinnaasarluata ilaatigut.

Demokraatini ilaasortaajunnaartumut paasisitsiniaaneq illuatungaanilu ilaasortaajunnaartup oqaaseqartarnermini namminersorpallaartarsimanera ajornartorsiutigineqartarsimapput, tassunga atatillugu demokraatit siulittaasuat aperaarput ajornartorsiummi pineqartumi kikkut politikkikkut pikkorippallaarsimanngitsut, akivorlu:

- Tunuartoq uani taasariaqarpoq, suleqatiminut sanilliullugu inorsarsimasoq. Ajoraluartumik inorsarnini taanna ajorsarnertut naqisimaneqarnertullu tigusarsimavaa.

Demokraatit siulittaasuat Per Berthelsen aamma oqarpoq Esmar Bergstrømip Inatsisartuni ataatsimiititaliani Demokraatit sinnerlugit inigisaasa Demokraatinut uterteqqinneqarnissaat Demokraatinit sulissutigineqassasoq.