Esmar Bergstrøm tunuarpoq

Inatsisartuni ilaasortaq Demokraatineersoq, Esmar Bergstrøm, paartiiminit Demokraatinit tunuarpoq.

Partiip siulittaasuanik Per Berthelsenimik mailikkut allaqatigeereernerup kingorna, Esmar Bergstrøm Demokraatinit aniniarluni nalunaarpoq.

Esmar Bergstrøm oqarpoq, Demokraatinit aninini partiip qullersaqarfiata naammagittaalliuteqarsimaneranik pissuteqartoq.

- Inatsisartuni Demokraatit gruppianni isumaqatigiissutaareersunut akerliusumik pissusilersortarnitit, oqaluttarfimmilu tusagassiuutinullu oqaaseqartarnitit, assut naammagittaallliutigineqarput.

Esmar Bergstrømip Demokraatinit aninerminut tunngavilersuummini allagarsiarisimasani taama issuaaffigaa.

Esmar Bergstrøm Demokraatinit aninerminut atatillugu nalunaarummini aamma allappoq, Demokraatini angiinnartussiaajunnaarusunnini, oqarsinnaatitaanerminillu killilersorneqarnini, naammagilerini, tamakkulu paartiimit aninerminut pissutaasut allappoq.

- Eqqortuliorumasuuvunga, isummersornikkalu upperaakka, tamannalu Demokraatini piviusunngortinneqarsinnaasimanngilaq, Esmar Bergstrøm allappoq.

Demokraatit siulittaasuat, Per Berthelsen, Esmar Bergstrømip partiiminnit tunuarneranut ilaatigut ima oqarallarpoq.

- Politikkikkut aaqqiagiinnginnerit assigiinngitsut pisarmata tunuarnera partiitsinni oqiliallaatigeqaarput, Esmar Bergstrømilu ajunngitsunik tamanik kissaallutigu – Demokraatit siulittaasuat oqarpoq.