Esmar Bergstrøm Demokraatiujunnaarpoq

Partii sinnerlugu oqaaseqartarnikkut killilersorneqarama Demokraatinit anivunga, taama Esmar Bergstrømip, Demokraatit sinnerlugit Nuup kommuneani Inatsisartunilu ilaasortaasup Demokraatinit ippassaq anini nassuiarpaa:

-Politikkimut tunnganerusuni isumaqatigiinneq ajulertaratta. Assersuutigalugu Arctic Umiaq Linemut tunngasut uannut oqaaseqarfigeqquneqanngillat, aamma naliginnaasumik attartugassanut inissianut tunngasunik oqaaseqaqqusaajunnaarpunga, uffa ataatsimiititaliani taakkununnga tunngasuni Demokraatit sinnerlugit ilaasortaallunga. Tamanna tulluaattutut isigaara- isumaqatigiinneq ajulertaratta- tamanna ajornartorsiutitut isigaara.

Sooq taamaattoqarsimaneranik aperigatsinni akisinnaannginnerarpaa, tamaattorli erseqqissaatigaa nammineq isummani saqqummiuttarsimagini, aammali allat isumaat akuerisarsimagini.

- Kisianni Demokraatini ilaasortatut saqqummiuttakkakka amerlanertigut ilanngangaatsiarneqartaramik.

Taavami Esmar Bergstrøm partiimi imminut immaqa tulluanngitsumiissimavoq? Tassunga ima akivoq:

- Taamaalluarsinnaavoq, kisianni partiip programmia atuaraangakku, aamma ippassaq atuaqqikkaluarpara, tassa isumaginninnermut tunngasunik soqutigisaqartorujussuugama, tassuunakkut programmi uannut tulluartorujussuugaluarpoq. Kisianni immikkuualuttunut tunngasut tikikkaagatsigit isumaqatigiinnginneq aallartittarami.

Esmar Bergstrøm Demokraatinit anisoq Inatsisartuni partiinit marlunnit oqaloqatiginnissimavoq. Kattusseqatigiit Partiiannit kaffisoriartoqqusaasimavoq, Atassutikkunnillu aamma ikinngutinnersumik saaffigineqarsimalluni. Taamaattorli qanoq pinissi suli aalajangersumik maannangaaq isummerfigisinnaanngikkini oqarpoq, sapaatilli akunnerini marlussunni eqqarsarfissaqarfissaqarsinnaanissi neriuutiginerarpaa.