Eskimuunngooq unnugu takutinneqassaaq

Isiginnaartitsissut atserneqarsimasoq Eskimuunngooq

Silamiunit unnugu Nuummi isiginnaartitsissutigineqassaaq. Isiginnaartitsissut quujasaarutaasoq Hans Egede-p nunatsinnut tikeqqaarneranik imaqartoq, inersimasuunerusunut isiginnaagassiaavoq.

- Quujanarneruvoq imaluunniit uanga isumaga anippara oqaluttuarisaanitsinnut qanoq isiginninnera, soorlu takorluulerlugu Hans Egede tikikkami qanormita paradiisi nassuiarnialeramiuk qanoriliorpamita ilaa, inunnut orpimmik takunikuunngitsunut iipilimik takunikuunngittunut taavalu pulateriaarsuk taanna aamma ilaa….eqqarsarlunga ila illartarsimassapput, Makkak Kleist oqarpoq.

Isiginnaagassiap ilumoorsaartuunnginnera aammattaaq erseqqissaatigaa. Aperaarput isiginnaartitsissut qanga suliaralugu aallartissimaneraa.

- Ukiut arfinillit matuma siorna Norgemi Tromsømi najugaqarallarama suliarinikuuara. Siornaak Canadami tuluttut isiginnaartitsissutigivarput aamma taava massakkut aamma maani nunatsinni takuterusullugu kalaallisut. Soorunami aamma allaanerulaarpoq, soorlu norskisut norskinillu isiginnaartoqarluni isiginnaagassiap ilusaa oqaluttuarneralu aamma allaavoq, isiginnaagassiami pineqartut ilarpassui uagut kalaallit nalunngereeratsigit taava pisariaqarsimanngilaq ilai oqaluttuarinissai, Makka Kleist oqarpoq.

Isiginnaagassiaq sapaatiuppat aamma takutinneqassaaq.